Aho Isi igeze ikoranabuhanga rirayoboye. Riri ku isonga mu kwihutisha iterambere ry’imibereho y’abatuye umubumbe ndetse ni ryo ryifashishwa mu mfuruka zose z’ubuzima, muri iki gihe ikoranabuhanga ryanageze mu rwego rw’ubuvuzi aho usanga ryifashishwa mu kwihutisha serivisi yo kwita ku barwayi, bikabafasha gukira vuba.

Mu buvuzi bugezweho, mu Mujyi wa Kigali hatangijwe ikoranabuhanga rishya rya “Lasik’’ ryifashishwa mu kuvura abarwaye amaso ndetse bambara amadarubindi bakaba bashobora gutana ukubiri na yo, bagakomeza imirimo yabo bitabasabye kuyifashisha.

Inzobere mu Buvuzi bw’Amaso mu Bitaro bya Pyramids Eye Center, Dr Mohamed Nasif, yabwiye IGIHE ko ubu buvuzi bugezweho ndetse ari ubwa mbere butangiye gukoreshwa mu Karere ka Afurika y’Iburasirazuba u Rwanda ruherereyemo.

Uyu muganga ufite ubunararibonye mu kuvura no kubaga amaso, yize muri Kaminuza ya Cairo mu 2006. Yakoze amahugurwa atandukanye yatangiriye i Cairo, asoreza muri Kaminuza y’Ubuvuzi y’i Glasgow muri Ecosse mu 2015.

Yavuze ko Ibitaro bya Pyramids Eye Center biherereye ku Kicukiro mu Mujyi wa Kigali, bitanga serivisi zitandukanye z’ubuvuzi bw’amaso.

Dr Mohamed yagize ati “Dutanga serivisi zose zijyanye n’ubuvuzi bw’amaso zirimo ‘squint surgery’, ‘Cataract surgery’ yifashishwa mu gusimbuza imboni y’ijisho cyangwa ibindi bice by’umubiri n’ibindi bibazo ijisho rishobora kugira.’’

Ubu buvuzi bwiyongeraho ubwifashisha ikoranabuhanga buzwi nka “lasik’’, ubukoresho afashwa kongera kureba no gukora imirimo ye bitamusabye kwambara amadarubindi.

Iri koranabuhanga ryifashisha imirasire ituma umuntu yongera kubaka ubushobozi bwo kubona.

Ubu buvuzi bushobora kumara nibura iminota itarenze 20; ni ukuvuga iri hagati ya 10 na 15 y’ubuvuzi n’indi itanu umurwayi ashobora guhabwamo inama y’uburyo bwo kwiyitaho no gufata imiti.

Abahanga mu by’ubuzima bagaragaza ko iri koranabuhanga ryifashishwa hamaze gukorwa isuzuma ku miterere y’uburwayi bw’umuntu, harebwa niba nta ngaruka byamugiraho.

Ahagana mu 1980, ni bwo iri koranabuhanga ryatangiye gukoreshwa kandi ryemewe n’imiryango mpuzamahanga ikora mu buvuzi bw’amaso.

Dr Mohamed yakomeje ati “Tunatanga ubuvuzi bugezweho bufasha umuntu guhagarika gukoresha amadarubindi. Ndabizi ko ari bishya mu Karere ka Afurika y’Iburasirazuba. Umuntu wakoreshaga amadarubindi ashobora kuvurwa ntiyongere kuyifashisha. Ni uburyo bushya mu Rwanda ariko burasanzwe hanze y’igihugu.’’

Ni ubuvuzi bwifashisha imashini zigezweho

Ubuvuzi bw’amaso mbere yo kubukorerwa umurwayi aterwa ikinya gishobora kuba gisanzwe cyangwa icy’ubundi buryo binyuze mu gushyira igitonyanga mu jisho.

Dr Mohamed yavuze ko muri ubu buvuzi bifashisha imashini zibafasha kwihutisha serivisi y’ubuvuzi.

Ati “Muri iki gihe bisaba nibura iminota iri hagati y’ibiri n’itatu ngo umuntu avurwe akurwe ku madarubindi. Kuri serivisi zimwe na zimwe, urebye dufite imashini ziri mu zigezweho.’’

“Dufite abaganga bo ku rwego mpuzamahanga kandi bafite ubunararibonye. Ubuvuzi bwose umuntu yaba ashaka butwara hagati y’iminota ibiri n’icumi. Kubera ikoranabuhanga rigezweho dufite, buri kintu cyose kiba vuba kandi ubuvuzi buba bwizewe.’’

Ubuvuzi bwa ‘Lasik’ bwifashisha “Laser Machine’’, iyi ishobora kuvura umuntu usanzwe wambara amadarubindi hifashishijwe urumuri kandi atabazwe ngo ababare cyangwa ngo aterwe ikinya.

Mu minota 10 umaze gukorerwa ‘Lasik’ ni bwo ashobora gutangira kureba adakoresheje amadarubindi.

Umurwayi umaze kubagwa ahita atangira kureba ndetse amadarubindi akayafasha hasi, akongera gukora imirimo itandukanye nk’uko yabikoraga mbere. Icyo gihe yongera kureba, kwandika ndetse no gusoma kandi neza.

Abavurwa amaso hakoreshejwe ubu buryo bagomba kuba bafite imyaka iri hejuru ya 18; abana ntibayihabwa kuko imboni z’amaso yabo ziba zigikura. Ubu buvuzi kandi ntibuhabwa ababyeyi bonsa n’abatwite, mu kwirinda ingaruka bishobora kubagiraho.

Buri wese ntahabwa ubu buvuzi kuko habanza kwifashishwa ‘Investigation machine’ mu kugenzura niba akorewe ‘lasik’ nta kibazo yagira.

Nyuma y’aho yongera gusuzumwa hakarebwa niba yarashyizwe ku madarubindi abikwiye. Iyo ibisubizo binyuranye ashobora guhabwa ubundi buvuzi bitabaye ngombwa ko hifashishwa uburyo bwa ‘lasik.’

Umaze gukorerwa ubuvuzi hifashishijwe ‘lasik’ ni ukuvuga gukoresha urumuri ku jisho rimwe no ku rindi. Ubu buvuzi nta ngaruka bufite kuko bukorerwa umuntu hamaze gusuzumwa imboni ye, kandi benshi muri bo nta kibazo bibateza.

Uwakorewe Lasik asigara yitwararika akaba yajya kwisuzumisha bisanzwe ariko nta kindi kibazo.

Inkuru dukesha IGIHE

 

Reba izindi nkuru nshya…

Mu Burundi kubona imodoka (Bus) ni ikibazo gikomeye kandi gikomeje kwiyongera

Polisi yataye muri yombi abagaragaye bakubitira umugore mu muhanda mu karere ka musanze

 

Leave a Reply

Your email address will not be published. Required fields are marked *