Abaveterineri basabwe kwita ku buzima bw’amatungo barengera ubwa muntu

Abasore n’inkumi basoje amashuri ya kaminuza mu ishami ry’ubuvuzi bw’amatungo, muri Kaminuza y’u Rwanda, bazwi nka ‘abaveterineri’ basabwe kujya gufatanya na bagenzi babo basanzwe muri ako kazi, ariko bakagakora bazirikana kwita ku buzima bw’amatungo barengera ubuzima bwa muntu.

Ni zimwe mu  mpanuro bahawe n’urugaga rw’abaveterineri mu Rwanda RCVD, ubwo abo banyeshuri barangije kwiga mu mwaka wa gatanu ubuvuzi bw’amatungo uko ari 32 barahiriraga kwinjira muri urwo rugaga, biyemeza gukorera ku mategeko agenga abanyamwuga no kugira uruhare mu kurinda no gusigasira ubuzima bw’amatungo bugera ku buzima bwa muntu bya hafi.

Perezida w’Urugaga rw’Abavuzi b’amatungo mu Rwanda, Dr. François Xavier Rusanganwa, yababwiye ko umuhango wo kwinjiza abaveterineri mu mwuga ari ubwa kabiri ubayeho kuva umwaka ushize, ariko abawinjiramo bagomba kumva ko bafite aho bahurira n’ubuzima bwa muntu cyane.

Ati “Abaveterineri bahura n’ubuzima bwa muntu cyane, kuko barinda indwara kuko hari ndwara zituruka ku matungo zijya ku bantu; inshingano z’abaveterineri ni ukurinda izo ndwara kugira ngo zitajya ku bantu ariko hari n’indwara ziva ku bantu zijya ku matungo, na byo abaveterineri bagomba kubirinda.

Natanga nk’urugero, nk’indwara ziva mu mata, inka iyirwaye amata muzi akamaro afite ku bana no ku bantu bakuru barayanywa, inyama abantu hafi ya bose barazirya; za nyama bapima bagomba kuzipima bitonze kugira ngo hatagira indwara abantu baryamo zikabajyamo zikabanduza cyangwa se zikaba zanabica kandi urumva iyo ari nyama y’inka nta bwo yica umuntu umwe, inka yakwica abantu benshi, ari nayo mpamvu rero abaveterineri bagomba kubirahirira.”

Yakomeje avuga ko mu gihe uwarahiye arenze ku ndahiro agakora amakosa nkana abihanirwa, birimo no kwirukanwa mu mwuga aho ari ho hose, byanaba ngombwa agakurikiranwa n’izindi nzego zishinzwe amategeko.

Umwe mu barahiriye gukora uwo mwuga neza, Ishimwe Providence, urangije muri kaminuza y’u Rwanda ishami rya Nyagatare mu buvuzi bw’amatungo, yavuze ko indahiro nk’iyo ikomeye kuri we kandi kuba yakiriwe mu rugaga bituma agiye gukora umwuga uko yabirahiriye.

Ati “Ni ukuvuga ko ari umunsi ushobora kunshyira mu byago runaka igihe ntatiriye iyi ndahiro. Uru rugaga ruzadufasha byinshi cyane ko dusanzemo bagenzi bacu batangiye umwuga mbere yacu, bagiye kutwereka uko bari basanzwe bakora natwe tubazanire imbaraga nshya n’amaboko mashya kugira ngo turusheho kuzamura ubuvuzi bw’amatungo ndetse n’imibereho yayo muri iki gihugu no hanze.”

Mugenzi we Uwayezu Germaine, yavuze ko uwo mwuga abakobwa bakiri bake bawiga ariko imibare igenda izamuka uko imyumvire nayo igenda izamuka.

Ati “Twari abakobwa 9 mu bahungu 27, ahubwo abari imbere yacu ni bo bari bake kandi n’abari inyuma yacu ni benshi kuturusha. Umuveterineri nk’iyo yariye ruswa mu gupima inyama cyangwa se akazipima nabi ashobora kugira ingaruka ku buzima bwa muntu. Ngize uwo mbibonaho namushyikiriza ababishinzwe bakamuhana kuko aba yangije ubuzima bw’abantu muri rusange; icyo ni icyaha gihanwa n’amategeko nk’uko twabirahiriye.”

Abo bavuzi b’amatungo uko ari 32 baje basanga mu rugaga bagenzi babo 30 basoje kaminuza umwaka ushize bari hirya no hino mu gihugu mu kwita ku buzima bw’amatungo.

Soma inkuru yose hano

Yanditswe na : Mutungirehe Samuel

Comments are closed, but trackbacks and pingbacks are open.

error: Alert: Content is protected !!