Akimpaye Christine atorewe kuyobora urugaga rushamikiye kuri RPF Inkotanyi

Akimpaye Christine niwe utorewe kuyobora urugaga rushamikiye ku Muryango FPR Inkotanyi, igikorwa cyabereye mu Ngoro y’Umuryango iherereye mu Murenge wa Rusororo, Akarere ka Gasabo mu Nama y’Inteko rusange y’urugaga.

Akimpaye wabaye umukandida rukumbi kuri uwo mwanya yatowe ku majwi 1455 mu batoye 1492, haboneka imfabusa 37. Yungirijwe na Izabiriza Mediatrice watowe ku majwi 1141 ahigitse  Imaniriho Clarisse wagize 336 naho imfabusa ziba 15.

Marie-Mediatrice Izabiliza

Ku mwanya w’Umunyamabanga hatowe Murumunawabo Cecile ku majwi 1780 ahigitse kuri uwo mwanya Bampire Evelyne wagize amajwi 158 n’imfabusa 60.

Ubusanzwe Akimpaye Christine yari Umuyobozi w’Urugaga rushamikiye ku Muryango wa FPR Inkotanyi mu Ntara y’Amajyaruguru akaba n’umwe mu bagize Inama Njyanama y’Akarere ka Rulindo, akaba ari Umukozi wa Minisiteri ishinzwe imicungire y’ibiza.

Kabega Emilienne yatorewe kuyobora Komisiyo y’imiyoborere myiza ku majwi 1294 bihwanye na 92%, mu gihe Mbabazi Comfort yatorewe kuyobora Komisiyo y’ubutabera ku majwi 1096 angana na 93%.

Muri Komisiyo y’ubukungu hatowe Mubiligi Jeanne Francoise naho Nyiramana Perusse atorerwa kuyobora Komisiyo y’imibereho myiza mu Rugaga rushamikiye kuri FPR Inkotanyi.

Akimpaye Christine, mu ijambo rye yashimiye Komite icyuye igihe yari iyobowe na Mukantabana Marie, ku bikorwa byiza bagezeho, yemeza ko bazagera ikirenge mu cyabo.

Yasabye abagore gushyira mu bikorwa manifesto y’umuryango cyane cyane ingingo zirebana n’umugore n’umuryango.

Komite y’urugaga rw’abagore rushamikiye ku Muryango FPR Inkotanyi itorewe Manda y’imyaka 5, izasoza mu mwaka wa 2024.

Soma inkuru yose hano

Yanditswe na : Mugisha Benigne

Comments are closed, but trackbacks and pingbacks are open.

error: Alert: Content is protected !!