Amagare:  Ikipe y’u Rwanda  igiye kwitabira «Grand Prix Chantal Biya 2019»

Tariki 16-10-2019
Bertoua- Mbang (109,6 km)

Tariki 17-10-2019

Yaounde-Bafia (118,6 km)

Tariki 18-10-2019
Yaounde-Ebolowa (150,6 km)

Tariki 19-10-2019
Zoetete- Meyomessala (116,5 km)

Tariki 20-10-2019
Sangmelima- Douala (166,2 km)

Ikipe y’u Rwanda igomba kwitabira isiganwa mpuzamahanga muri Cameroun “Grand Prix Chantal Biya 2019” rizatangira tariki 15 risozwe tariki 20 Ukwakira 2019.

Iri siganwa  rigiye kuba ku nshuro ya 19  rizitabirwa n’ikipe y’u Rwanda izaba igizwe na Nzafashwanayo Jean Claude  uherutse kwegukana “Tour de la RDC 2019”, Munyaneza Didier, Manizabayo Eric, Byukusenge Patrick  bakinira ikipe ya Benediction Excel Energy na  Ruberwa Jean Damascene  ukinira ikipe ya Nyabihu CT.

Umutoza uzajyana n’iyi kipe ni Byukusenge Nathan usanzwe ari umutoza w’ikipe y’igihugu y’ingimbi n’ikipe y’abagore  naho umukanishi akaba ari  Maniriho Eric.

Aganira n’Imvaho Nshya, Byukusenge Nathan uzaba atoza muri iri rushanwa nawe yakinnye agikinira ikipe y’igihugu yavuze ko bari bamaze iminsi bitegura kandi yizera ko bazitwara neza kuko ajyanye ikipe irimo abakinnyi basanzwe bamenyereye amarushanwa harimo n’iri bagiye gukina.

Kuri gahunda biteganyijwe ko ikipe y’u Rwanda izahaguruka mu Rwanda ku wa Mbere tariki 14 Ukwakira 2019 irare igeze muri Cameroun mu mujyi wa Yaounde  hanyuma tariki 15 Ukwakira 2019 habe umuhango wo kwerekana amakipe yitabiriye uzabera mu mujyi wa Bertoua.

Irushanwa nyirizina rizatangira tariki 16 Ukwakira 2019 ahazakinwa intera ya mbere yo kuva ahitwa Bertoua banyure Abong basoreze ahitwa  Mbang (Km 109,6).

Tariki 17 Ukwakira 2019 hazakinwa intera ya kabiri yo kuva Yaounde bagera Bafia (Km 118,6). Intera ya 3  izakinwa tariki 18 Ukwakira 2019  aho izava Yaounde yerekeza Ebolowa (Km 150,6 ), intera ya 4  izakinwa tariki 19 Ukwakira 2019 ive ahitwa  Zoetete inyure Npwang isorezwe Meyomessala (Km 116,5) naho intera ya nyuma ya 4 ikinwe tariki 20 Ukwakira 2019 aho abasiganwa bazava Sangmelima banyure Yaounde basoreze Douala (km 166,2).

Iri siganwa rigizwe n’intera 5 rizasozwa abasiganwa bakoze intera ya kirometero 661,5.

Umwaka ushize ikipe y’u Rwanda ntiyabashije gusoza

Ubwo iri rushanwa riheruka kuba mu mwaka ushize wa 2018 ryari ryitabiriwe n’abakinyi 5 ari bo  Nsengimana Jean Bosco, Uwizeyimana Bonaventure, Rugamba Janvier, Manizabayo Eric  na Uwiduhaye.

Ubwo hajyaga kuba intera ya 4 ibanziriza iya nyuma, habaye impanuka aho imodoka yari itwaye ikipe y’u Rwanda, Burkina Faso na Cote d’Ivoire  yarenze umuhanda abantu 17 barakomereka bituma iyi ntera isubikwa.

Mu ntera ya 5 rero nta bwo abakinnyi b’u Rwanda bigeze bakina ari na byo byatumye badasoza iri siganwa ryegukanwe na Bellan Juraj wakiniraga ikipe ya Dukla Banska Bystrica muri Slovakia.

Ubwo imodoka yari itwaye ikipe y’u Rwanda yakoraga impanuka bigatuma idasoza mu isiganwa riheruka rya 2018

Soma inkuru yose hano

Yanditswe na : BUGINGO FIDELE

Comments are closed, but trackbacks and pingbacks are open.

error: Alert: Content is protected !!