Amahoro nta bwo apfa kuboneka gutyo, abantu barayaharanira – Kagame

Perezida Paul Kagame, akaba n’Umugaba w’Ikirenga w’Ingabo z’u Rwanda, yatangarije abasoje amasomo ya gisirikare ko u Rwanda rwifuza kuba igihugu cy’amahoro, abibutsa ko amahoro adapfa kuboneka gutyo gusa, ahubwo abantu bayaharanira binyuze mu buryo butandukanye burimo n’ubwo bamaze igihe bategurwamo.

Yabitangaje kuwa 16 Ugushyingo 2019, ubwo yari amaze guha impeta z’ishimwe, ipeti rya ofisiye ‘Second Lieutenant’ abasore n’inkumi 320, aho abakobwa  barimo ari 29 binjiye mu gisirikare cy’u Rwanda RDF, nyuma yo gusoza amasomo y’imyaka ine n’abasoje ay’umwaka umwe mu ishuri rya rikuru ya Gisirikare riherereye i Gako mu karere ka Bugesera.

Perezida Kagame yabibukije ko inshingano za mbere z’ingabo ari ukubaka no kurinda amahoro igihugu gikenera kugira ngo amajyambere n’ibindi bigerweho, abibutsa ko ariko amahoro adapfa kuboneka gutyo gusa ahubwo aharanirwa.

Umukuru w’Igihugu yagize ati “Turifuza igihugu cy’amahoro; amahoro akenshi nta bwo apfa kuboneka gusa gutyo, abantu barayaharanira. Hari uburyo bwinshi, hari uburyo mwateguwemo, ibyo ndumva bitazabagora kubyuzuza.

Tukabana hagati yacu, tukabana n’ibihugu duturanye, tukabana n’amahanga, tugahahirana, tukubahana; mbese ibyo dukwiriye kuba dukora birazwi, murabizi. Ariko nanone iteka nta bwo ibintu bihora byera de, hari ubwo abantu babusanya, banduranya, ubwo ariko ngira ngo mwateguriwe gukemura ibibazo nk’ibyo ngibyo mu nzira itewe n’uko ibyo bibazo biba byaje.”

Perezida Kagame yongeye gushimira abo bofisiye binjiye mu ngabo z’u Rwanda ku gihe cyabo bafashe bakanyura mu bikomeye ariko nanone bazi ko bibategurira ibyiza biri imbere.

Yashimiye kandi imiryango yabo, n’ababyeyi babo bemeye ko bitabira ayo mahugurwa n’inyigisho zijyanye n’umwuga wa gisirikare, bakaba barabaherekeje ubwo bateraga intambwe igana muri uwo mwuga n’ubu bakaba baje kwishimira intera bagezeho.

Perezida Kagame yabashimiye umuhate bagize kugeza basoje ayo masomo igihe cyose yabasabaga umwete, ubuhanga, kugira ngo bayasoze neza, anabasaba kwishimira ibyo bagezeho.

Ati “Ibi rero bikwiye kubaha no kububakamo imbaraga kugira ngo murusheho gukora byiza, gukora cyane ndetse mu bihe biri imbere uko imirimo yiyongera ni nako namwe muzagenda mutera imbere mu nzego, muzamuka mufata inshingano zirenze izo munyuzemo mu myaka ishize.”

Yabijeje ko nibabikurikirana gutyo bizabagirira akamaro bo ubwabo, n’ababo, n’igihugu muri rusange.

Kagame yabibukije ko ingabo z’u Rwanda zifite amateka yihariye, aho zafatanyije n’abaturage kugira ngo u Rwanda rugere aho ruri uyu munsi kandi ari nako bizakomeza kugira ngo igihugu kigere aho kifuza kugera.

Karengera Steven, umubyeyi ufite umunyeshuri washoje ayo masomo, asanga kuba umwana yarihitiyemo kujya mu ngabo bazakomeza kumushyigikira kugira ngo atange umusanzu mu gufatanya n’abandi mu bikorwa bigamije gufasha u Rwanda kugera ku mutekano usesuye.

Brig. Gen. Ephrem Rurangwa uyobora ikigo cya gisirikare cya Gako, yasabye abarangije aya mahugurwa gushyira mu bikorwa amasomo bize kugira ngo bakore igisirikare cy’umwuga, yibutsa amwe mu masomo bize arimo  gutozwa kuba abayobozi mu ngabo, disiplini, indangagaciro za gisirikare, ashima ubufatanye bagiranye na kaminuza y’u Rwanda kugira ngo bahe ubushobozi abana b’Abanyarwanda.

Ba Ofisiye bato bitwaye neza mu gihe cy’ayo mahugurwa, Karisa Henry, Ndamage Sam ndetse na Mukunzi Betty, bahawe ibihembo n’Umukuru w’Igihugu, ndetse yanabambitse imidari y’ishimwe, abashimira ko bitwaye neza bakaba indashyikirwa.

Ishuri rikuru rya gisirikare rya Gako ryatangiye mu mwaka wa 1999, kuva muri 2015 ku bufatanye na Kaminuza y’u Rwanda batangira batanga ikiciro cya kaminuza mu mashami y’ubuvuzi, ubumenyi mu byagisirikare na enjeniyora.  Mu byiciro byasoje uyu munsi harimo bane bigiye muri bimwe mu bihugu byo hanze. Mu mwaka w’amashuri utaha ishuri rikuru rya Gako rizatangiza ayandi mashami mashya arimo ubutabire, imibare, n’ubugenge.

Soma inkuru yose hano

Yanditswe na : Nshim Janvier

Comments are closed, but trackbacks and pingbacks are open.

error: Alert: Content is protected !!