Amarenga yo gusubira muri gereza kuri Victoire Ingabire wemeye ko FDU Inkingi iri mu mutwe wa P5

Hashize iminsi Ingabire Victoire Umuhoza yitaba Urwego rw’Ubugenzacyaha RIB kugirango abazwe ibyaha bitandukanye akurikiranyweho. Ubuheruka ikinyamakuru cyamenye ni kuwa Gatatu tariki 13 Ugushyingo 2019, icyo gihe umuvugizi wa RIB, Marie Michelle Umuhoza akaba yarabwiye ikinyamakuru Ukwezi ko n’ubwo ibikubiye mu iperereza batabitangaza, ibyaha Victoire Ingabire akurikiranyweho birimo icyo kurema umutwe witwaje intwaro, ubwicanyi, ubwinjiracyaha mu bwicanyi, ubujura n’ibindi.

RIB kandi yari imaze iminsi itangaje ko Ingabire Victoire yahamagajwe kugirango abazwe ku bijyanye n’aho ahuriye n’igitero cyagabwe mu karere ka Musanze mu ntangiriro z’ukwezi gushize k’Ukwakira, kigahitana abantu 14, abandi 18 bagakomereka. Ingabire Victoire nawe yemereye ikinyamakuru Ukwezi ko amaze igihe yitaba uru rwego ariko avuga ko ibyaha akurikiranyweho atabyemera ndetse ko adashobora gukora Politiki yica abaturage.

Hashize igihe havugwa iby’ubufatanye bw’amashyaka arwanya ubutegetsi bw’u Rwanda yibumbiye mu mutwe witwa P5 arimo RNC ya Kayumba Nyamwasa, n’ishyaka FDU Inkingi rikaba ribarizwamo. Ubwo bufatanye mu bikorwa bihungabanya umutekano w’u Rwanda ninabwo bivugwa ko bwagize uruhare mu gitero cyishe abaturage i Musanze.

Ingabire Victoire yemeye ko FDU Inkingi iri muri P5 ariko abajijwe byinshi n’umunyamakuru ku bikorwa by’uyu mutwe, ashimangira ko byabazwa umuvugizi wa P5. Yagize ati: “Kuba FDU iri muri P5 ntabwo nigeze mbihakana, FDU iri muri P5… Ntabwo ndi umuvugizi wa P5 bityo ndagirango ibyo bibazo bya P5, ibya RNC, ibya Sankara wabibaza abo bireba.”

Uretse kuba Ingabire Victoire arimo gukurikiranwa n’Ubugenzacyaha, na Perezida wa Repubulika ubwo yakiraga indahiro z’abayobozi bashya kuri uyu wa Kane, n’ubwo atavuze amazina yaciye amarenga y’uko we (Ingabire) n’abandi bashaka guhungabanya umutekano w’u Rwanda, bagiye gushyirirwaho imbaraga zidasanzwe mu kurinda umutekano w’igihugu.

Perezida Kagame ati: “Hari bamwe nshaka kuburira bihisha inyuma y’ibintu bitandukanye, bakihisha inyuma ya Politiki, Demukarasi, Ubwisanzure kandi natwe ibyo ari inshingano zacu za mbere kumenya ko hari demukarasi n’ubwisanzure… Hanyuma abihisha inyuma y’ibyo ugasanga barashyigikirwa n’abantu bari hanze, bakaryoherwa… Muraza kutubona… Ntushobora kuba uri hano mu mahoro n’umutekano twishyuye imyaka myinshi igiciro cy’amaraso ngo nurangiza uduhungabanye… Tuzagushyira aho ukwiye kuba uri…. Abantu bagize uruhare mu mahano ya Jenoside, bagakomeza kuzana izo politiki n’ingengabitekerezo, bakajya muri gereza hanyuma bakavamo ku bw’imbabazi hanyuma bagatangira kongera gukina iyo mikino nanone… Tuzagushyira aho wagakwiye kuba ubarizwa hanyuma abo basakuza kuri ibyo tuzareba icyo bazakora”

Si ubwa mbere Ingabire Victoire aburiwe ko natitonda azisanga yasubiye muri gereza kuko no mu mpera z’umwaka ushize yaburiwe na Perezida Paul Kagame nyuma y’igihe gito ahawe imbabazi. Gusa uyu mugore avuga ko adafite ubwoba kuko yiteguye kuba yakongera gufungwa.

REBA VIDEO UKO INGABIRE VICTOIRE ABIVUGA HANO:

Soma inkuru yose hano

Yanditswe na : Chief Editor

Comments are closed, but trackbacks and pingbacks are open.

error: Alert: Content is protected !!