Basketball:  Hatashywe  ikibuga  cyubatswe na NBA Africa muri gahunda yo kuzamura impano z’abana

Tariki 12 Ukwakira 2019 muri IPRC Kigali mu karere ka  Kicukiro  hatashywe ku mugaragaro ikibuga  cyubatswe na  NBA Africa  ku bufatanye n’uruganda  OCP rwo muri  Maroc rukora ibyifashishwa mu buhinzi akaba ari mu rwego rwo kuzamura impano z’abakiri bato  mu mukino wa Basketball.

Iyi gahunda ikaba yarahuriranye no gutangiza “Jr. NBA Rwanda League 2020”, gahunda yatangijwe na NBA Africa igamije kuzamura impano z’abakinnyi bato mu mukino wa Basketball  mu batarengeje imyaka 15.

Mu muhango wo gufungura ku mugaragaro iki kibuga ndetse no gutangiza  irushanwa ry’abakiri bato  rya 2020 hari  Visi Perezida wa NBA, George Land,  Umunyamabanga Uhoraho muri Minisiteri y’Umuco na Siporo “MINISPOC”, Ntigengwa John, Perezida w’ishyirahamwe ry’umukino wa Basketball mu Rwanda “FERWABA”, Mugwiza Desire n’abandi batandukanye barimo  Jerome Williams wakiniye New York Knicks muri NBA ndetse n’itsinda ry’abahanzi “Sauti Sol” basanzwe ari ba Ambasaderi b’iyi gahunda.

Perezida wa FERWABA, Mugwiza Desire yavuze ko igikorwa nk’iki ari ingirakamaro kuko umukino wa Basketball utatera imbere hatari ibikorwa remezo nk’ibi. Yakomeje avuga ko iyi ari intangiriro ariko ko bazakomeza kuvugana na NBA Africa ku buryo hakubwa n’ibindi bibuga.

Iyi gahunda mu Rwanda iri  mu bigo 30 mu bakobwa n’abahungu aho buri kigo kiba gifite abana 15 bari munsi y’imyaka 15 bivuze ko buri mwaka abana 900 banyura muri iyi gahunda.

Umunyamabanga Uhoraho muri “MINISPOC”, Ntigengwa John yashimiye NBA Africa na OCP ku gikorwa nk’iki kuko ibikorwa remezo bya siporo  biri mu bibazo u Rwanda rufite. Yavuze ko ari byiza kuko abana bagiye kubona aho bakinira. Yanavuze ko bazakomeza gufatanya kugira ngo umukino ukomeze utere imbere.

George Land, Visi Perezida wa NBA yatangaje ko  bifuje gukorana n’u Rwanda kuko ari igihugu kiza kandi gifite  ubuyobozi  bwiza bwifuza guteza imbere umukino wa Basketball. Yavuze ko bazakomeza  gufatanya cyane muri iyi gahunda yo kuzamura uyu mukino bihereye mu bakiri bato.

Kuba iyi gahunda ya “Jr. NBA Rwanda League” ireba gusa abatarengeje imyaka 15, FERWABA na MINISIPOC  bavuga ko bafashe gahunda yo gukorana ku buryo abana bagaragaje impano bakurikirwa hakaba hari n’abafashwa gukomereza amashuri hanze y’u Rwanda.

Uretse ibi kandi kuko abana banyura muri iyi gahunda umwaka umwe, muri FERWABA bavuga ko bavuganye na BK nk’umuterankunga uburyo hajyaho irushanwa ry’abatarengeje imyaka 17.

Mu mafoto ubwo hafungurwaga ikibuga cya Basketball muri IPRC-Kigali

Foto: Muzogeye Plaisir

Soma inkuru yose hano

Yanditswe na : BUGINGO FIDELE

Comments are closed, but trackbacks and pingbacks are open.

error: Alert: Content is protected !!