Arsenal yashyiriyeho buri mukinnyi wayo agahimbazamusyi k’ibihumbi 500£ mu gihe bayihesha itike yo gukina irushanwa rya UEFA Champions League mu mwaka utaha w’imikino.

Uyu muhigo Arsenal ishoboye kuwugeraho byaba bisobanuye ko buri mukinnyi wayo yazatahana angana n’akayabo ka miliyoni zirenga 670 Frw.

Iyi kipe iherereye mu Majyaruguru y’Umujyi wa Londres iheruka gukina mu marushanwa y’amakipe yabaye aya mbere iwayo mu 2017. Icyo gihe, yasezerewe muri 1/8 itsinzwe ku giteranyo cy’ibitego 10-2 mu mikino ibiri yayihuje na Bayern Munich.

Gusoreza mu makipe ane ya mbere muri Premier League bizaba ari inyungu kandi kuri bamwe mu bakinnyi ba Arsenal bafite amasezerano abemerera kuzazamurirwa umushahara mu gihe bazashobora kuyigeza mu mikino ya UEFA Champions League.

Gukina muri aya marushanwa y’i Burayi kwa Arsenal byanayongerera amahirwe yo kugumana Bukayo Saka w’imyaka 21, umaze kuyitsindira ibitego umunani agatanga n’imipira itanu ivamo ibitego mu mikino 25 ya Premier League yo muri uyu mwaka w’imikino wa 2021/22.

Kuri ubu, Arsenal iri mu myanya ine ya mbere, irasabwa gukomeza kwitwara neza ntisubire inyuma kugira ngo izabone itike yo kuzakina imikino ya UEFA Champions League.

Ikipe y’Abarashi ifite amanota 48 ku mwanya wa kane mu gihe igifite ibirarane by’imikino itatu izahuramo n’amakipe ya Liverpool, Chelsea na Tottenham.

Ubusanzwe, ikipe ishoboye kubona itike yo kuzakina muri Champions League igenerwa ishimwe rya miliyoni 50£ [miliyari 67,4 Frw] n’Impuzashyirahamwe y’Umupira w’Amaguru i Burayi (UEFA).

Inkuru ya igihe.com

 

Leave a Reply

Your email address will not be published. Required fields are marked *