Cricket:  Martin Suji yahawe inshingano zo  gutoza no kuzamura uyu mukino mu Rwanda

Tariki 13 Ugushyingo 2019 ni bwo mu ishyirahamwe ry’umukino wa Cricket mu Rwanda “RCA” berekanye Martin Armon Suji ukomoka muri Kenya wahawe inshingano zo kuba umuyobozi wa tekinike, gutoza amakipe yose y’igihugu ndetse no gufasha abatoza kuzamura urwego rwabo rw’imitoreze.

Umuyobozi ushinzwe ibikorwa muri RCA, Byiringiro Emmanuel yavuze ko bahisemo Martin Suji nyuma yo kubona ko afite ubushobozi  dore ko umwaka ushize wa 2018 yatoje ikipe y’igihugu kandi akabikora neza.

Ati : “ Twahisemo kumuzana ngo tumuhe amasezerano y’igihe kirekire. Azakora akazi ko kuba umuyobozi wa tekinike kandi azaba ashinzwe amakipe y’igihugu yose.”

Mu byo Martin Suji yasabwe ni ukuzamura urwego rw’imikinire y’amakipe y’igihugu ndetse no gufasha abatoza kuzamura urwego  rwabo. Umuyobozi  ushinzwe ibikorwa muri RCA, Byiringiro Emmanuel  yavuze ko Martin Suji  yahawe amasezerano y’imyaka 2 ashobora kongerwa bitewe n’uko  akazi n’inshingano yahawe bizagenda.

Nyuma yo guhabwa izi nshingano, Martin Suji yavuze ko yishimiye kuba yarasabwe n’u Rwanda kuza bakifatanya mu kuzamura umukino wa Cricket. Yagize ati : “ Niteguye gukoresha imbaraga zange zose kugira ngo  ibyo nasabwe nzabigereho mfasha umukino wa Cricket gutera imbere mu Rwanda.”

Umuyobozi ushinzwe ibikorwa muri RCA, Byiringiro Emmanuel yavuze ko Martin Suji umwaka ushize yatoje igihe gito ikipe y’igihugu kandi mu mezi 4 yahinduye byinshi mu  mikinire anafasha abakinnyi  kugira ishyaka. Yakomeje avuga ko aho yakoze hose yagiye afasha cyane.

Martin Suji yakiniye ikipe y’igihugu ya Kenya kuva 1996 kugeza 2006. Yakinnye imikino y’igikombe k’Isi inshuro 3 (1996, 1999 na 2003). Yatoje ikipe y’igihugu ya Kenya ndetse na Uganda.

Nyuma yo kuzana umutoza mushya, Josua Mwanja wari umaze iminsi ari umutoza yahawe inshingano zo gukomeza gukora ibijyanye n’iterambere ry’umukino yibanda mu kuzamura  impano z’abana bato no gusakaza umukino mu gihugu hose.

Mwanja avuga ko mu gihe yari amaze ari umutoza yishimiye aho  ikipe y’igihugu  mu bagore igeze ndetse n’abakinnyi bakiri bato bagaragaje urwego rwiza kandi yizera ko bizakomeza.

Harebwe uko umwaka wa 2019  wagenze n’ibizakorwa umwaka utaha wa 2020

Mbere yo kwerekana umutoza mushya, habaye inama yahuje abatoza bose bavuye mu ntara ndetse n’abakozi bose ba RCA. Byiringiro yagize ati : “Twarebye uko umwaka wa 2019 wagenze,  ibikorwa  byakozwe  n’ibisigaye uko bizagenda.”

Akomeza  avuga ko  uyu mwaka bagize ibikorwa byinshi kandi byiza aho bishimira kuba baragejeje umukino mu gihugu hose bakanagirana amasezezeramo y’ubufatanye n’abaterankunga batandukanye. Mu mpera z’uyu mwaka wa 2019 barateganya irushanwa ry’abatarengeje imyaka 15 mu bakobwa n’abahungu aho bizeye kuzabona impano nyinshi.

Muri iyi nama banarebeye hamwe ibizakorwa mu mwaka utaha wa 2020 byabafasha gukomeza kuzamura uyu mukino.

Abakozi ndetse n’abatoza barebeye hamwe ibyakozwe mu mwaka wa 2019 n’ibiteganyijwe muri 2020

Soma inkuru yose hano

Yanditswe na : BUGINGO FIDELE

Comments are closed, but trackbacks and pingbacks are open.

error: Alert: Content is protected !!