David Luiz nyuma yo gusura u Rwanda yijeje ko agiye gukangurira n’abandi kurusura

David Luiz ukinira ikipe ya Arsenal mu Bwongereza   nyuma y’uruzinduko rw’iminsi 2  yagiriye mu Rwanda yatangaje ko yishimiye uko yakiriwe ndetse anizeza ko agiye gukangurira inshuti ze  kuzaza gusura u Rwanda.

Uyu mukinnyi ukomoka muri Brazil yageze mu Rwanda mu ijoro ryo ku wa  Kane tariki 10 Ukwakira 2019 ari kumwe n’umubyeyi we Regina Celia Moreira Marinho n’umugore we Bruna Da Conceicao Loureiro  aho yari aje muri gahunda  yo gusura u Rwanda ahagarariye ikipe ya Arsenal ifitanye amasezerano n’u Rwanda yo kwamamaza  no gukangurira  abatuye Isi kuza gusura u Rwanda “Visit Rwanda”. Tariki 13 Ukwakira akaba ari bwo yasubiye mu Bwongereza.

David Luiz akigera mu Rwanda yakiriwe na bamwe mu bayobozi b’Urwego rw’igihugu rw’Iterambere “RDB”. Tariki 11 Ukwakira 2019 yasuye urwibutso rwa Jenoside yakorewe Abatutsi rwa Kigali ku Gisozi anakirwa na Perezida w’u Rwanda Paul Kagame.

Nyuma yagiye gusura Pariki y’ibirunga mu Karere ka Musanze aho yaruhukiye  muri Singita Kwitonda Lodge. Aha yakoze ibikorwa bitandukanye birimo gutera igiti muti gahunda yo  kubungabunga Pariki y’Ibirunga.

David Luiz ari kumwe n’abari bamuherekeje yasuye ingagi  nyuma abonana  na Guverineri w’Intara y’Amajyaruguru ibarizwamo aka karere, Gataba JMV. Yabonanye kandi  n’Umuyobozi wa Pariki y’Ibirunga, Uwingeli Prosper  n’umukozi muri RDB mu ishami ryishinzwe ubukerarugendo no kubungabunga ibidukikije, Mutangana Eugene.

Tariki 12 Ukwakira 2019 ku munsi wa nyuma w’uruzinduko rwa David Luiz yakurikiranye umukino w’umunsi wa gatatu wa shampiyona y’ikiciro cya mbere mu Rwanda aho ikipe ya APR FC yatsindaga Etincelles FC ibitego 3-0, umukino ukaba warabereye kuri Sitade ya Kigali i Nyamirambo.

Gusa mbere gato y’uyu mukino, David Luiz yakurikiranye  abana bafite impano mu mupira w’amaguru bitoreza mu “Agaciro Football Academy” itozwa na Rwibutso Claver aho yashimye cyane umwaka witwa Ishimwe Alonso Prince.

Nyuma yo gukurirana uyu mukino, David Luiz Moreira Marinho ufite imyaka 32 y’amavuko yagiranye ikiganiro n’itangazamakuru ndetse anabonana n’abafana b’ikipe ya Arsenal.

Uyu muhango wabereye muri Kigali Convention Center ahari Peter Silverstone, umuyobozi ushinzwe ubucuruzi muri Arsenal  ndetse n’umuyobozi muri RDB ushinzwe  ubukerarugendo no kubungabunga ibidukikije, Kageruka Ariella.

David Luiz yatangaje ko yishimiye uko yakiriwe kuva yagera mu Rwanda. Yavuze ko yasuye ibice bitandukanye by’igihugu kandi yizera ko  azongera akagaruka. Yakomeje avuga ko agiye gushishikariza inshuti ze yaba ari muri Brazil  aho akomoka ndetse n’i Burayi kuza gusura u Rwanda.

Umuyobozi ushinzwe ubucuruzi muri Arsenal, Peter Silverstone yatangaje ko  bashimira David Luiz kuba yaremeye akaza muri iyi gahunda ikipe ya Arsenal ifitanye n’u Rwanda. Yavuze ko bidahagarariye aha ko hazaza n’abandi bakinnyi ndetse mu gihe cya vuba hari abakinnyi b’ikipe ya Arsenal mu bagore na bo bazasura u Rwanda.

Muri Gicurasi 2018 ni bwo igihugu cy’u Rwanda binyuze mu Rwego rw’Igihugu rw’Iterambere “RDB” hasinywe amasezerano  y’ubufatanye n’ikipe ya Arsenal FC y’imyaka 3 yo gukangurira abatuye Isi kuza gusura u Rwanda “Visit Rwanda”.

Umuyobozi muri RDB ushinzwe  ubukerarugendo no kubungabunga ibidukikije, Kageruka Ariella yatangaje ko kuva iyi gahunda yatangira u Rwanda rwaje ku isonga mu bihugu bisurwa cyane.

Mu mafoto ubwo  David Luiz yageraga i Musanze

David Luiz yasuye ingagi muri Pariki y’ibirunga

David Luiz yarebye umukino  washampiyona anabona n’abakunzi ba Arsenal

Soma inkuru yose hano

Yanditswe na : BUGINGO FIDELE

Comments are closed, but trackbacks and pingbacks are open.

error: Alert: Content is protected !!