Drogba witabiriye inama y’urubyiruko  yakiriwe na Perezida  Paul Kagame

Uwahoze ari umukinnyi w’icyamamare mu mupira w’amaguru, Didier Drogba akaba akomoka muri Cote d’Ivoire  yakiriwe na Perezida w’u Rwanda, Paul Kagame mu Village Urugwiro.

Didier Drogba  yakiriwe na Perezida Paul Kagame tariki 11 Ukwakira 2019 nyuma y’inama y’ihuriro ry’urubyiruko rw’Afurika “Youth Conneckt Africa summit 2019”  yabereye mu Rwanda  kuva tariki 09 kugeza 11 Ukwakira 2019.

Drogba ubu ufite imyaka 41 y’amavuko akaba yarahagaritse gukina umupira w’amaguru mu Gushyingo 2018 ni  Ambasaderi w’ishami ry’umuryango w’abibumbye rishinzwe iterambere (UNDP)  akaba yaratumiwe muri iyi nama y’ihuriro ry’urubyiruko rw’Afurika ndetse anatanga n’ikiganiro gikangurira urubyiruko gukora no kwiteza imbere banatezimbere umugabane wabo w’Afurika.

Didier Drogba washinze umuryango Didier Drogba Foundation” yaherukaga mu Rwanda muri 2009 ubwo yari yaje muri gahunda ya “One Dollar Campain” aho  yari igamije gushaka inkunga yo kubakira abana barokotse Jenoside yakorewe Abatutsi mu 1994 batagiraga aho baba akaba yari yazanye n’abandi bakinnyi bakomeye bakomoka muri Afurika.

Tariki 10 Ukwakira 2019, Drogba  yasuye urwibutso rwa Jenoside yakorewe Ababutsi  ruherereye ku Gisozi maze agira n’ubutumwa atanga aho  avuga ko gusura aha hantu ari inshingano ndetse ari ngombwa guha agaciro abishwe muri Jenoside. Yakomeje agira ati : “Ku njye mfite inshingano zo kwigisha urubyiruko rw’Afurika n’urw’Isi yose ingaruka z’ibikorwa nk’ibi.”

Didier Drogba mu butuma bwe akomeza avuga ko nyuma y’imyaka 10 ubwo yaherukaga mu Rwanda kubera umuhate w’Abanyarwanda  igihugu cyahindutse ikitererezo mu mibanire, kubabarina ndetse n’iterambere. Yasoje agira ati : “Nishimiye kugaruka mu Rwanda kandi nkumva meze nk’uri mu rugo.”

Didier Yves Tébily Drogba ukomoka muri Cote d’Ivoire ari naho yavukiye yakinnye umupira w’amaguru ari rutahizamu makipe atandukanye mu Bufaransa arimo ikipe ya Marseille nyuma ajya mu Bwongereza mu ikipe ya Chelsea ari nayo yamugize icyamamare cyane. Yakiniye ikipe y’igihugu ya Cote d’Ivoire kuva 2002-2014.

Mu mafoto ubwo Perezida Paul Kagame yakiraga Didier Drogba

Didier Drogba yanasuye urwibutso rwa Jenoside yakorewe Ababutsi mu 1994 ruhereye ku Gisozi

Soma inkuru yose hano

Yanditswe na : BUGINGO FIDELE

Comments are closed, but trackbacks and pingbacks are open.

error: Alert: Content is protected !!