Ibiruhuko ntibikwiye kuba ibihe by’ubwigenge ku bana – Dr. Munyakazi

Mu gihe abana bo mu mashuri abanza n’ayisumbuye batangiye ibiruhuko, ababyeyi barasabwa kubaba hafi no kwita ku burere bwiza bwabo kugira ngo bazasubire ku ishuri bameze neza kandi batekereza neza kandi ngo si n’igihe cy’ubwigenge ku bana ngo bakore ibidakwiye kuko batari mu ishuri.

Ibi ni ibitangazwa n’Umunyamabanga wa Leta muri Minisiteri y’Uburezi ushinzwe amashuri y’inshuke, abanza n’ayisumbuye, Dr. Munyakazi Isaac, nk’ubutumwa agenera abana bajya mu biruhuko n’ababyeyi babo, aho asaba abanyeshuri bagiye mu biruhuko gukomeza kwitwara neza no gufasha ababyeyi imirimo yo mu rugo aho kwirirwa ku mihanda no mu zindi ngeso zabagusha mu bitari byiza.

Yagize ati “Turasaba abana bagiye mu biruhuko kwitwara neza no gufasha ababyeyi imirimo bashoboye no kumvira inama z’ababyeyi kugira ngo bazagaruke ku mashuri ari abana buzuye kandi bafite indangagaciro z’umunyeshuri mwiza.”

Dr. Munyakazi asaba ababyeyi kuba hafi y’abana mu bihe by’iminsi mikuru isoza umwaka kugira ngo badatakaza indangagaciro nziza kuko iyo abantu bahugiye mu minsi mikuru badakunze kwita ku bireba n’ibitareba abana kugira ngo ibiruhuko bitaba umwanya w’ubwigenge.

Avuga ko ibiruhuko bidakwiye kuba umwanya wo gufungurira umwana amarembo y’ibibi byinshi, ahubwo bikaba umusaruro wo gukomeza gusigasira indangagaciro z’umunyeshuri mwiza.

Dr. Munyakazi asaba ababyeyi kugenzura aho abana batemberera n’ibyo bakora bagashyirirwaho ingengabihe y’ibikorwa bakwiye gukora harimo no gusanga abandi, kujya mu masomero, gutembera n’ibindi.

Ati “Ibyo byose nitubikoresha neza bizatubyarira umusaruro wadufasha, kugira ngo nibagaruka ku ishuri tuzasange hari byinshi bungutse, bigaragare ko ibiruhuko bidufashije.”

Dr. Munyakazi asaba ko abana bagirwa inama uko bishobotse kandi bakabategurira imirimo itavunanye bakora mu bihe by’ibiruhuko aho guhora ku mihanda bahigira ingeso zitari nziza, ahubwo bagafata akanya ko kuganira n’ababyeyi babo, gukorana mu mirimo bashoboye no kuruhuka kuko ari kimwe mu bibazanye mu rugo.

Avuga ko imirimo ku mwana atari ikibazo kandi ko itabujijwe, ngo ahubwo yaba igisubizo cyo gufasha abana gukunda umurimo, gusa ngo bakarindwa imirimo mibi kandi ivunanye.

Ababyeyi na bo bavuga ko iyo abana baje mu kiruhuko bagira uruhare mu burere bwabo kugira ngo bazasubireyo ari abanyeshuri beza kuri roho no ku mubiri ndetse no mu bitekerezo.

Irasanzwe Marine ni umubyeyi, avuga ko mu bihe by’ibiruhuko ari bwo umubyeyi akwiye kuganira n’umwana ku myitwarire ikwiye n’idakwiriye ku mwana w’Umunyarwanda, imirimo umwana akwiye gukora kugira ngo afashe ababyeyi n’inama nziza agirwa n’ababyeyi.

Ati “Ibiruhuko ni umwanya mwiza w’ubusabane bw’ababyeyi n’abana, ibiganiro hagati y’impande zombi n’inama zituruka ku mubyeyi zibwirwa umwana mu rwego rwo kugira imyitwarire myiza iboneye kandi ikwiriye umwana w’Umunyarwanda.”

Muhizi Jonas na we ni umubyeyi, ashimangira ko ababyeyi bakwiye guha abana umwanya mu biruhuko wo kuganira na bo, wo gusabana no kwisanzura kuko baba badaherukana, ariko inama nziza zikaba zihatse byose mu biganiro umubyeyi agirana n’umwana.

Ati “Abana bacu bakwiye gutozwa uburere bwiza muri ibi biruhuko, imirimo itavunanye, tubonye hafi abo dutuma kandi nanone ntitwibagirwe kubaha n’umwanya wo kuganira no kwidagadura.”

Avuga ko bidakwiye ko umwana uje mu biruhuko yirirwa mu buriri akabyutswa no kujya ku meza atazi n’uwabitetse, ngo bakwiye gutozwa kugira icyo bakora mu rugo iwabo, bityo bakaba ibisubizo mu miryango yabo.

Ababyeyi bafite inshingano zo gukomereza aho abarezi bari bagejeje mu kurera abana, bityo bakazasubira ku ishuri bariyongereye indangagaciro n’imyitwarire myiza ikwiye Umunyarwanda.

Soma inkuru yose hano

Yanditswe na : Mugisha Benigne

Comments are closed, but trackbacks and pingbacks are open.

error: Alert: Content is protected !!