Imikino njyarugamba igiye kujya yifashishwa mu bujyanama ku ihungabana

Ishyirahamwe ry’abajyanama b’ihungabana mu Rwanda (RCT-Ruhuka) ku bufatanye n’umuryango “Martial Arts For Justice” wo muri Canada  bakoresheje amahugurwa abajyanama ndetse  na bamwe mu bagiye bahura n’ihungabana  uburyo hakoreshwa imikino njyarugamba mu kurwanya ihungabana.

Iyi mikino njyarugamba irimo Karate,Taekwondo n’iyindi. Uwashinze uyu muryango “Martial Arts For Justice”, Master Dean Simnoff usanzwe ari umwarimu mu mukino wa Taekwondo yatangaje ko muri RCT-Ruhuka bifuje ko bafatanya  mu rwego rwo gufasha guhangana n’ihungabana binyuze mu mikino njyarugamba.

Muri iki gikorwa, Master Dean Simnoff yafatanyije na Mushambokazi Zula wakinnye umukino wa Taekwondo ubu akaba ari umutoza ndetse na Sinzi Tharcisse nawe wakinnye umukino wa Karate akaba ari umutoza.

Master Dean Simnoff yemeza ko nyuma yo guhugura aba bantu byagaragaye ko hari ibyo byabafashije cyane mu bijyanye no guhangana n’ihungabana.

Umunyamabanga nshingwabikorwa  wa RCT-Ruhuka, Abatoni Jane Gatete  yavuze ko ibi bintu bikiza ihungabana kuko bifasha  kwiremamo ikizere. Yagize ati: “ Aha hari  bamwe mu bo dufasha ndetse n’abajyanama bazigisha abandi.”

Abatoni yavuze ko mu bujyanama ku ihungabana mu buryo bwinshi bari basanzwe bakoresha bongeyemo n’imikino njyarugamba.

Bamwe mu bagiye bahura n’ihungabana bitabiriye aya mahugurwa bavuze ko byabafashije cyane. Mwamini Renee utuye Gikomero muri Gasabo yatangarije Imvaho Nshya ko yungutse byinshi kuko yumvise agifite imbaraga kandi yumva umubiri urirekuye.

Yagize ati: “Ubujyanama bw’amagambo nta bwo bufasha nk’uku, mu mikino utera ingumi, ugatera umugeri, nge nshobora kumenya ko nafashwe  n’ihungabana nkajya ahantu ngakora imyitozo bya bintu bikagenda.”

Mukasine Maria nawe utuye Gikomero avuga ko iyi myitozo  yatumye bamera neza kurushaho. Ati: “Iyo umubiri wishimye ni bwo ubasha kuvuga ikintu kikuremereye mu mutima, imyitozo rero nk’iyi ituma umubiri wirekura.”

Bamwe mu bajyanama ku ihungabana bitabiriye aya mahugurwa, Rugina Gervais na Mukandizihiwe Mediatrice bavuze ko iyo umuntu yagize ihungabana igice cy’umubiri n’imitekerereze  biba byatandukanye. Uburyo bwo gukoresha imyitozo y’imikino njyarugamba ni uburyo bwiza bwo kunga ibi bice.

Mu buryo bari basanzwe bakoresha bagiye no kongeramo iyi gahunda y’imikino njyarugamba kuko babonye ifasha cyane.

Aya mahugurwa yabereye  muri Kiberinka Cultural Centre Kibagabaga kuva tariki 11 kugeza 15 Ugushyingo 2019 yitabiriwe n’abantu 20.

Zula arimo gukoresha imyitozo y’imikino njyarugamba

Aha bateraga umugeri

Master Dean Simnoff washinze umuryango “Martial Arts For Justice”

Soma inkuru yose hano

Yanditswe na : BUGINGO FIDELE

Comments are closed, but trackbacks and pingbacks are open.

error: Alert: Content is protected !!