Ingabo zacu ntizihinyuzwa n’iminsi mu gihe ahandi iminsi ikona ingwe – Min Shyaka

Minisitiri w’ubutegetsi bw’igihugu, Prof Shyaka Anastase asaba Abanyarwanda kurinda no kubumbatira umutekano w’igihugu, ngo kuko udahari ibyagezweho bitabasha kurama.

Ibi yabivugiye mu Karere ka Rusizi, Intara y’uburengerazuba, asaba abatuye ku nkiko z’igihugu n’Abanyarwanda muri rusange kurinda ibyagezweho basigasira umutekano u Rwanda rufite.

Yagize ati “Turasaba Abanyarwanda bo ku nkiko z’igihugu, ari abari imbere mu gihugu, abari mu mijyi no mu cyaro gusobeka ubufatanye n’Ingabo z’igihugu tukarinda umutekano n’ibyo twagezeho. Buri wese akaba ijisho rya mugenzi we. Tudafite umutekano ubumwe ntibwashoboka, tudafite umutekano agaciro kacu ntitwagasigasira, tudafite umutekano nta terambere twageraho n’ibyo tumaze kugeraho ntitwabigira. Ubwo umutekano ni ingabo y’igihugu, Ni injishi y’u Rwanda.”

Yashimiye cyane ingabo zidatezuka mu kurinda umutekano, aho asanga ahandi ingabo zitezuka ku kurinda umutekano, ariko ingabo z’u Rwanda zikaba zidatsimburwa.

Ati “Ntizihinyuzwa n’iminsi mu gihe ahandi mu bihugu iminsi ikona ingwe. Ingabo zacu ntizizigera zihinyuzwa n’iminsi kubera gukunda igihugu no ku kirinda.”

Yagaragaje uruhare rw’abaturage mu gufatanya n’Ingabo kurinda umutekano w’igihugu, atanga urugero rw’ejo bundi ubwo abacengezi bateraga mu Karere ka Musanze, aho abakobwa babiri birutse ku mucengezi bagashirwa bamufashe bakamuzirika ubwabo bakamushyira ingabo.

Ati “Ngabo zacu ubu natwe abasivili beza turi ingabo, abakobwa bacu n’abagore bacu nabo ni ingabo, inzego z’ibanze turi maso, ni biba ngombwa mujye mubaturekera tubinigire, ibyo si jye ubivuze ahubwo ni abaturage babyivugiye.”

Avuga ko iyo abakobwa badahabwa agaciro ngo habeho uburinganire, bari kubona abo bagizi ba nabi bakajya mu gikari, ariko ngo babirutseho kugeza babafashe, agaciro bahawe katumye bakora ibikomeye.

Ati “Murumva ko uburinganire bufite icyo bumaze, bwageze hose, abakobwa n’abagore bagira uruhare mu mutekano w’igihugu.”

Prof Shyaka yagarutse ku mutekano w’ubuzima n’umuryango nabyo bikwiye gusigasirwa, abantu bakabyara abo bashoboye kurera, kubaka umuryango utekanye, uha buri wese agaciro, uharanira kurwanya ihohotera, abari bakarindwa gutwara inda zitateganyijwe, kubyara abo bashoboye kurera, bakabona ifunguro ryuzuye, bagakura bakajya mu ishuri.

Minisitiri Shyaka yashimye ubunyamwuga bw’ingabo z’u Rwanda, avuga ko zidahinyuzwa n’iminsi

Ati “Umuryango utekanye, ufite amahoro, ubasha kwivuza, kwirinda indwara, umuryango utekanye ni umusingi w’amahoro. Mu gihe dutaha urugo rwiza rw’Impinganzima, tuzirikane ku muryango nyarwanda ugomba kubaho neza, kubaho mu mahoro no mu bwisanzure, mu mudendezo wuzuye.”

Prof Shyaka yagarutse ku ndangagaciro ya mbere buri munyarwanda akwiye kugira nko gukunda igihugu, avuga ko igihugu atari imisozi kuko igihugu ari abanyarwanda, ashimangira ko ukunda igihugu atagira amacakubiri, akunda Abanyarwanda bose, ntagendera ku ngengabitekerezo ya Jenoside, ahorana ukuri, yimakaza uwo muco uharanira ko Abanyarwanda bigira.

Ati “Gukunda igihugu ni indangagaciro ikomeye, idufasha gusigasira ubumwe bwacu nk’umusingi ukomeye kuko ari byo bidufasha kugera ku burumbuke.”

Bamwe mu bagejejweho izi nama na Minisitiri Shyaka mu Karere ka Rusizi

 

 

Soma inkuru yose hano

Yanditswe na : Nshim Janvier

Comments are closed, but trackbacks and pingbacks are open.

error: Alert: Content is protected !!