Ikigo cy’Igihugu Gishinzwe Ubuzima (RBC), yatangaje ko guhera kuri uyu wa Kabiri taliki 16 hatangijwe igikorwa cyo gukingira COVID-19 kirimo kubera muri za gare zinyuranye zo mu Mujyi wa Kigali kikaba cyatangiriye muri gare ya Nyabugogo. 

Iyi gahunda biteganyijwe ko ikorerwa muri gare zose zo mu Mujyi wa Kigali aho abagenzi bategera imodoka ari zo gare ya Nyabugogo, Nyarugenge (DownTown), Kimironko, Remera na Nyanza. Gahunda ni  ‘Ikingize utegereje bisi’.

Nkuko byatangajwe kuri twitter ya RBC harimo gutangwa doze ya mbere n’iya kabiri ku bantu bose bafite imyaka 18 kuzamura ndetse no gupima abantu bose babishaka.

Ni igikorwa kireba buri wese utuye mu Mujyi wa Kigali waba yaracikanywe ari uwikingiza ubwa mbere kimwe n’uwikingiza urwa kabiri. Ibi bikaba bizafasha gukumira burundu iki cyorezo cyane ko kuri ubu ishusho y’imibare y’abandura yagabanyutse ikaba iri ku gipimo kiri munsi ya 0.5%.

Minisiteri y’Ubuzima ikomeza gushishikariza abantu kwitwararika bakubahiriza amabwiriza yo kwirinda Covid-19 nubwo inkingo zigenda ziboneka ndetse imibare y’abandura ikaba igabanyuka, kuko n’uwikingije ashobora kuba yarwara gusa ntazahare nk’utarakingiwe.

Kwikingiza ni ingenzi kandi ni inshingano kandi bitanga icyizere ko abantu bakomeza imirimo n’ibikorwa bitandukanye batikanga ko ejo yangwa ejobundi iki cyorezo yakubura umutwe ahubwo abantu bagakomeza gukora neza nk’uko byari bisanzwe kitaraduka.

Imibare ya Minisiteri y’Ubuzima igaragaza ko mu Mujyi wa Kigali abantu 93% bamaze gukingirwa icyorezo cya Covid-19 intego ikaba ari iyo kugera ku 100%.

U Rwanda rufite intego y’uko uyu mwaka uzarangira nibura hamaze gukingirwa 40%.

Imvaho Nshya

By Admin

Leave a Reply

Your email address will not be published. Required fields are marked *