Leta y’ u Rwanda iramagana umuco wo ‘gutera ivi’ ukomeje gufata intera mu Banyarwanda

Gutera ivi ni ikintu gifatwa nk’ ikigezweho mu Rwanda cyane ko gikorwa n’ abasore b’ abasirimu.

Umusore witwa Nshimiyimana Janvier Romeo yatangarije UKWEZI ko gutera ivi abifata nko guha icyubahiro umukobwa, gusa we avuga ko atabikora ngo ahubwo umukobwa niwe ukwiye gupfukamira umugabo.

Uyu musore avuga ko gutera ivi bigaragaza gucira bugufi umuntu runaka, gusa ngo abasore babikora babikora kubera ikigare.

Agira ati “Ku bwanjye gutera ivi mbona ari igikorwa gikorwa ku bw’ ikigare cy’ abantu. Rimwe na rimwe umuntu abikora bimuvuye ku mutima cyangwa bitamuvuye ku mutima. Icyo bimaze ni icyubahiro ku mugore ariko njye sinabikora kuko umukobwa niwe ukwiye gupfukamira umusore amushimira ko agiye kumushyira mu rugo”.

Hari abasanga uyu muco wo gutera ivi uri mu byakongera za gatanya kuko ngo hari igihe umukobwa ashobora kwanga gusebya umusore kuko gutera ivi bikorerwa mu ruhame akamwemerera bakabana atamukundaga bagera mu rwabo ibibazo bigatangira.

Impirimbanyi y’ umuco nyarwanda akaba n’ umuyobozi w’ ikigo nyarwanda cy’ ubuzima bushingiye ku muco, Muganga Rutangarwamaboko, avuga ko gutera ivi atari ibintu by’ I Rwanda.



Impirimbanyi y’ umuco nyarwanda Muganga Rutangarwamaboko

Aganira na UKWEZI yagize ati “Mu muco nyarwanda gutera ivi nta byigeze bibamo na gatoya nta n’ igishashi cyabyo kigeze kibamo. Si ibintu by’ I Rwanda kuko mu makuru tugenda tubona hirya no hino kubo bibaho hari abo bitungura, kandi gushakana ntabwo ari gitunguro. Biriya usanga ari ibintu bigendana n’ amarangamutima kandi urushako ntabwo ari ibintu bigendana n’ amarangamutima”

Rutangarwamaboko avuga ko abasore bakwiye gusubira ku muco wo kurambagiza nk’ uko kera byakorwaga , imiryango ikarambagizanya, bagashimana aho kugira ngo umusore n’ ‘umukobwa bashingire ku marangamutima yaka nk’ amashara bashinge urugo’

Abwira abavuga ko gutera ivi ari ibigezweho yagize ati “Iyaba byabaga ibigezweho ari ibintu bishingiye ku muco wacu ntacyo byaba bitwaye, ariko ibintu by’ ibitoragurano bishingiye ku muco w’ ahandi utazi ukuntu byaje, urumva byageza abantu hehe se? Inama ngira abasore n’ inkumi ni ukubaho ubuzima bushingiye ku muco nyarwanda”.

Rutangarwamaboko amara impungenge abatekereza ko mu Rwanda rwanone imiryango idashobora kurambagizanya bitewe n’ imibereho yazanywe n’ iterambere.

Avuga ko umuhungu n’ umukobwa bashobora kumenyana bigana , basengana cyangwa bakorana, bagatangira basurana hagati yabo imiryango ikaba iramenyenyanye ariko ibyo gushinga urugo bitarazamo bikazaza nyuma.

Igihe kikazagera umusore akagisha inama umuryango we ko ashaka kuzazanamo umukobwa, ababyeyi be basanga uwo mukobwa bamuzi bakajya gufata irembo bakazasabira umuhungu wabo wa mukobwa yababwiye.

Rutangarwamaboko ati “Umukobwa ni uw’ umuryango yashatsemo ntabwo ari uwawe wowe musore”.

Nta mukobwa wigeze yemera kuvugana na UKWEZI avuga ko ashyigikiye umuco wo gutera ivi gusa umwe mu bagore twaganiriye yatubwiye ko asanga abakobwa aribo bakwiye gutera ivi bashimira abagabo. Ati “Abagabo Imana yabahaye icyubahiro natwe tugomba kukibaha”.

Dr Jacques Nzabonimpa, Umuyobozi w’ Ishami ry’ Umuco Nteko Nyarwanda y’ Ururimi n’ Umuco aganira na Radio Flash yasabye abasore b’ Abanyarwanda kurambagiza uko byakorwaga mu muco nyarwanda avuga ko agaya kuba iyo habayeho gutera ivi, imiryango ibibona mu itangazamakuru mbere y’ uko ibibwirwa n’ abana bayo.

Agira ati “Umuryango ujya kubona ukabibona mu itangazamakuru, utaranabibwirwa utaranabimenya njye niho ngayira bariya bantu batera amavi”.


Umuco wo gutera ivi yaturutse mu bihugu by’ I Burayi, bikekwa ko waba ufitanye isano no guha umuntu icyubahiro kuko hari ubwo umuntu apfukamira mugenzi we yakoshereje akabikora nk’ ikimenyetso cyo guca bugufi mu rwego rwo kumusaba imbabazi.

Soma inkuru yose hano

Yanditswe na : Nsanzimana Ernest

Comments are closed, but trackbacks and pingbacks are open.

error: Alert: Content is protected !!