Madamu Jeannette Kagame yagaragaje ko abato n’ababyiruka bakwiye gukomeza kwigishwa amateka mu kwirinda ko Jenoside yakorewe Abatutsi yazongera ukundi.

 

Ni mu butumwa yatanze ubwo yatahaga Ubusitani bw’Urwibutso buherereye i Nyanza ya Kicukiro ku Cyumweru, tariki ya 11 Nzeri 2022.

Madamu Jeannette Kagame yasobanuye ko ubu busitani bubumbatiye amateka akomeye igihugu cyanyuzemo.

Madamu Jeannette Kagame aravuga Ati “Akenshi bavuga ko ubusitani ari ikimenyetso cy’ubuzima kandi ni byo koko! Nubwo ubusitani butashywe uyu munsi bubumbatiye amateka yacu atuvuna, burigihe ubwofata igihe kiminsi {100} twibuka abacu bazize Jenoside yakorewe Abatutsi  iyo wubuye amaso, ukabona ubwiza bw’aha hantu n’uko hatoshye, wumva umutima uruhutse.’’

Inkuru dukesha IGIHE Yavuze ko ubusitani bwatekerejwe hashingiwe ku mateka ya Jenoside yakorewe Abatutsi, yasize ibikomere byinshi.

Ati “Uyu munsi twese dutewe ishema n’uko twabashije kubirenga nubwo benshi bakiri kure muri runo rugendo.’’ Rwo kwiyubaka tugendeye kumateka yaranze igihugu cyacu.

“Icyifuzo cya buri wese, ni uko ubu busitani bukomeza kutubera ahantu hadufasha kwibuka no kwiyubaka. Muri ubu busitani harimo ubuzima n’umurava wanyu ndetse ni isezerano rishya ko tutazongera kunyura mu bihe nk’ibyatugejeje hano uyu munsi. Urwo rukundo, icyo cyubahiro byose biri muri buri rurabo, igiti, buri buye na buri kimenyetso kidukikije.’’

Ati “Igihe cyose tuje muri ubu busitani bwo kwibuka, bijye biduha imbaraga zo guhobera ubuzima, no kugirana isezerano n’abacu ndetse n’igihugu, ko tutazahwema kurasanira u Rwanda.”

Madamu Jeannette Kagame yasabye ko ibikorwa nk’ibi bibumbatira amateka bikanafasha kwigisha abato bikwiye kubungwabungwa.

Yasobanuye ko kuva mu myaka 28 ishize, igihugu cyakomeje kwiyubaka ahanini gishingiye mu kunga ubumwe bw’abagituye.

Ati “Igihugu dukunda, uyu munsi cyunze ubumwe. Cyunze ubumwe binyuze mu muhate w’abamennye amaraso yabo ngo babohore igihugu. Ndetse no mu gihe cy’izuba rikakaye, cyangwa se ibihe bigoye tunyuzwamo, u Rwanda ruzakomeza gutohagira.’’

Madamu Jeannette Kagame yagaragaje ko amasomo ya Jenoside yakorewe Abatutsi akwiye kwigishwa uhereye ku bato.

Ati “Kuki Jenoside yakorewe Abatutsi, icyaha cyibasiye inyokomuntu itigishwa mu mashuri hashingiwe ku bikorwa n’ubuhamya bw’abayirokotse n’abemeye uruhare bayigizemo? Ni gute twaharanira ko amateka ku makimbirane ashingiye ku moko yashyirwa mu mfashanyigisho z’abana bacu ku buryo intero ya “Ntibizongere ukundi” itaba ikoreshwa gusa mu bihe byo kwibuka.’’

Madamu Jeannette Kagame yavuze ko abitambika iterambere ry’u Rwanda baba abari mu gihugu n’abaturuka hanze yacyo bagapfobya amateka badakwiye guhabwa umwanya.

Ati “Tuzaharanira kurandura imizi y’ahashobora kuva urwango rushingiye ku moko hose. Ntituzemera ko amagambo y’abahakana aganza ubuzima bwacu. Tuzahangana n’abashaka kuroga ubutaka bwacu bunagaburira ubu busitani.’’

Yijeje ko abarokotse Jenoside bazakomeza kubaba hafi kandi batazacogora ku kuvuga ku mateka. Ati “Ku bacu twibuka, urumuri rwanyu ruzatumurikira iteka. Igihe cyose twiyemeje kwibuka no kubumbatira amateka yacu, ntimuzazima bibaho. Abahakana urupfu mwishwe bafite urugendo rurerure kandi rutazagera aho rubageza.”

“Ntituzahagarika gushaka amakuru yerekeye abacu twabuze no kwishimira imbaraga n’ubwitange bw’intwari zacu ziriho n’izatabarutse zaharaniye ko buri Munyarwanda aba mu gihugu cye atekanye.’’

Yavuze ko aba Banyarwanda banze gupfa nk’ibigwari bakwiye kubera abandi imbaraga zo guharanira kugira imibereho myiza no kugera ku iterambere.

Bruce Clarke wazanye igitekerezo cyo kubaka ubu busitani yashimye abagize uruhare kugira ngo uyu mushinga urangire.

Ati “Twarwubatse ku nkunga twahawe na Madamu wa Perezida wa Repubulika na Imbuto Foundation. Icyo gihe mu myaka 22 [mu 2000] ubwo twari aha, twari kumwe na Madamu Jeannette Kagame, nishimiye ko nyuma y’iki gihe n’uyu munsi tukiri kumwe.”

 

 

Ubusitani bw’Urwibutso buri ahantu hafite amateka yihariye

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yavuze ko ku Rwibutso rwa Jenoside rwa Nyanza ahubatse ubu busitani hafite amateka yihariye kuko hiciwe Abatutsi batereranywe.

Ati “Aha ni hamwe mu hantu hiciwe Abatutsi benshi mu Mujyi wa Kigali hakaba hafite umwihariko w’uko abo Batutsi bishwe benshi bari bahungiye ku ngabo z’Umuryango w’Abibumbye zari mu butumwa bwitwaga ubw’Amahoro zari mu Rwanda kuva mu 1993 zikambitse mu nzu za Eto Kicukiro bazihungiraho bizeye ubuzima.”

Yavuze ko aba Batutsi baje gutereranwa birangira interahamwe n’abasirikare ba Leta yariho icyo gihe babazamuye babicira ku musozi wa Nyanza, harokoka mbarwa.

Dr Bizimana yavuze ko ubu Busitani bw’Urwibutso buzaba isomo kuri benshi mu bijyanye n’amateka ya Jenoside.

Ati “Iki gikorwa cy’ubusitani kirimo amasomo menshi abantu bazahigira harimo n’akamaro kanini bizamarira abazahakoresha, icya mbere twavuga ni uko Ubusitani bw’Urwibutso ari ahantu Abanyarwanda n’inshuti z’u Rwanda bazajya baganirira mu mitima n’abacu bishwe n’ubutegetsi bubi bwakoze Jenoside.”

“Ni ahantu h’amahoro, ni ahantu uzahasura azajya aza agatuza, ituze rikamufasha ku gutekereza ku bubi bwa Jenoside no kwishakamo imbaraga zo gushimangira amahitamo yacu yo kuba umwe no kutemera ikintu cyose cyagirira nabi u Rwanda n’Abanyarwanda.”

Umuyobozi w’Umujyi wa Kigali, Pudence Rubingisa, yagaraje ko “u Rwanda rwavuye kure, rwavuye mu icuraburindi ariko ubu turatengamaye dufite amahoro kandi turagenda twiyubaka umunsi ku munsi.”

Yavuze ko nubwo Abanyarwanda bageze kure biyubaka bakwiye kuzirikana amateka mabi banyuzemo kandi bagaharanira kuyigisha abatayazi, yemeza ko ubu busitani buzafasha muri iyo gahunda.

Ubusitani bw’Urwibutso bwashyizweho ibuye ry’ifatizo muri Kamena 2000 na Madamu Jeannette Kagame. Bwatunganyijwe ku bufatanye bw’Umuryango wa IBUKA uharanira inyungu z’abacitse ku icumu.

Ubu busitani bugizwe n’ibice 15 by’ingenzi byose byerekana ubuzima Abatutsi babayeho mu 1994 ubwo bahigwaga. Bwubatswe bigizwemo Uruhare n’Umunyabugeni w’Umufaransa, Bruce Clarke.

Igice cya mbere cyibugize ni icyiswe ‘Ubusitani bw’Umunye’, kirimo amabuye ahagarariye abarenga miliyoni bishwe muri Jenoside ndetse n’ubwoko bw’ibiti bumera mu butayu, buhagarariye ingabo zahoze ari iza RPA zitarebereye, zahagurutse zikarwanya Jenoside nubwo byari bikomeye.

Ikindi gice ni icyiswe ‘ubusitani butoshye’, kirimo ibiti ijana bihagarariye iminsi 100 Jenoside yamaze mbere yo guhagarikwa.

TURABASABA GUKURIKIRA INKURU TUBAGEZAHO NO KUDUHA IBITEKEREZO CYANGWA INYUNIZI MURAKOZE.

INSTAGRAM: @AGEZWEHO

Perezida Kagame yihanganishije u Bwongereza ku itanga ry’Umwamikazi Elizabeth II

RDC na EAC basinyanye amasezerano yo koherezayo ingabo

 

Leave a Reply

Your email address will not be published. Required fields are marked *