Nyabihu : Abajyanama b’ubuhinzi bagira uruhare mu guhashya nkongwa idasanzwe

Abajyanama b’ubuhinzi barishimira uruhare bagira mu gufasha abahinzi muri rusange mu guhashya Nkongwa idasanzwe.

Babivugiye mu murenge wa Shyira mu Karere ka Nyabihu ubwo  USAID Hinga Weze ni umushinga watangijwe ku bufatanye n’Ikigo k’Igihugu Gishinzwe Guteza Imbere Ubuhinzi n’Ubworozi (RAB) ku nkunga y’Umuryango w’Abanyamerika wita ku iterambere mpuzamahanga (USAID) ukaba wibanda ku buhinzi no kunoza imirire ukorera mu Turere 10 aho igomba gufasha abaturage 530.000. yifatanyaga n’abaturage batuye mu murenge wa Shyira kurwanya Nkongwa idasanzwe mu bigori.

Dukuzemariya Beata, umujyanama w’ubuhinzi mu murenge wa Shyira mu karere ka Nyabihu  avuga ko bakomeje ingamba mu kurwanya Nkongwa idasanzwe ku buryo bazaca ukubiri no kurumbya.

Yagize ati : “Kuri ubu turishimira aho tugeze mu kurwanya Nkongwa idasanzwe kuko Hinga Weze yaduhaye ubumenyi mu kurwanya Nkongwa idasanzwe, yaduhaye amahugurwa, iduha ibikoresho byo kwipfuka mu gihe dutera umuti wa Nkongwa kandi  iradufasha ikaduhugura natwe tugahugura abahinzi.”

Yakomeje agira ati : “Mbere batari batugeraho nta musaruro twagiraga. Twahingaga mu kajagari, none ubu dusigaye duhinga kinyamwuga ku mirongo bityo umusaruro ukiyongera.”

Akomeza avuga ko ahinga Ari 8, kuri ari ngo yasaruraga ibiro 60 by’ibigori. Kuri ubu ngo asaruraho  ibiro 300.

Yagize ati : “Ubu niteguye guhinga ngahunika kandi ngasagurira amasoko.”

Mu bindi yishimira avuga ko abashinzwe ubuhinzi babegera ku buryo babagisha inama mu buhinzi z’ibibazo bafite bakabasha gufatanyiriza hamwe mu kubishakira umuti.

Byongeye kandi ngo ubu bamaze gusobanukirwa uko batera umuti wa Nkongwa idasanzwe kuko iyo ukoreshejwe nabi  bishobora gutera indwara.

Habimana Laurent, umwe mu bajyanama b’ubuhinzi mu murenge wa Shyira mu karere ka Nyabihu, abarizwa muri Koperative y’abajyanama b’ubuhinzi avuga ko kuri ubu bahagurukiye kurwanya Nkongwa idasanzwe ku buryo bizeye kuzabona umusaruro utubutse.

Yagize ati : “Abahinzi tubafasha kwiga  amatekiniki mu buhinzi natwe twahuguwemo na Hinga Weze ndetse  n’abandi bafatanyabikorwa ku buryo twizeye umusaruro utubutse.”

Akomeza yungamo ati : “Kuri ubu hari impinduka mu buhinzi kuko twabonye amahugurwa ndetse  n’imfashanyigisho mu buhinzi. Hari n’amatekiniki Hinga Weze itwigisha gutera ibigori muburyo bwa kijyambere n’ibishyimbo bikungahaye ku butare.”

Avuga ko iyo bahinga batera mu buryo bwa tekiniki.

Yagize ati : “Hari ikintu batwigishije ku buryo bwiza bwo gutera ibishyimbo ariko mbere ntabyo twari tuzi kuko  wafataga nk’ahantu watera nk’ibiro bitanu ugateramo nk’ibiro nka 30 ariko ubu dusigaye tubitera mu buryo bugezweho ndetse no gukoresha ifumbire mbere kandi ntabwo twajyaga dukoresha ifumbire mva ruganda ku bishyimbo, uwageragezaga yakoreshaga ifumbire y’imborera gusa. Icyo ni ikintu kiza Hinga Weze yadufashije.”

Byongeye kandi ngo yabafashije kurwanya no kumenya Nkongwa idasanzwe none kuri ubu ngo bizeye ko umusaruro uziyongera.

Ati : “Ino nkongwa ubwa mbere ikiza twarayirwanyije tutayizi ariko nk’abajyanama b’ubuhinzi ibirebana n’ubwirinzi bashoboye kubiduha kuko, ntabwo wakwigisha udafite ubwirinzi nk’itsinda ry’abantu nka 15 ntabwo bose wabigisha nta bwirinzi ufite. Ni ngombwa kugira  udupfuka munwa n’uturinda ntoki twambara turi kwerekera abantu uko bagomba gutera umuti.”

Abahinzi ntibagihangayikishwa na Nkongwa idasanzwe

Ahinzi bavuga ko ubu nkongwa iza bagahangana nayo kugeza ishize kuko ngo iyo wayihanduye, ugatera n’umuti nkongwa ntiba igitumye umuhinzi arumbya.

Byongeye kandi, ngo bamaze gusobanukirwa uburyo bwo gukumira no kurwanya  Nkongwa  idasanzwe ubu ngo baciye ukubiri no kurumbya.

Bavuga ko gukorera hamwe no gutera umuti byagize uruhare mu guhashya nkongwa idasanzwe.

Umukozi ushinzwe ubuhinzi n’umutungo kamere mu murenge wa Shyira Maguru Aloys ashimira umushinga USAID Hinga Weze ku bufatanye na RAB ndetse n’Akarere ka Nyabihu ku mbaraga bashyize mu kurwanya Nkongwa idasanzwe.

Avuga ko iki gihembwe k’ihinga muri iyi site ya Mukungwa bahinze ku buso bwa hegitari 150 ariko ko Nkongwa idasanzwe bayifatiye ingamba.

Yagize ati : “Ubundi twagiraga Nkongwa idasanzwe ikatubera ikibazo gikomeye ariko guhera mu kwezi kwa Nzeri 2019  twagize imvura ihagije. Buriya imvura ihagije nayo kuri Nkongwa irafasha kuko Nkongwa itinya imvura nyinshi aho amagi yayo, twa tunyo nkongwa iba yateye yicwa n’imvura. Ubwo Nkongwa irimo ariko ntabwo ikabije ku buryo abahinzi babyuka mu gitondo bayihandura ndetse no ku mugoroba.”

Ibyo ngo biterwa nuko ubusanzwe Nkongwa idasanzwe iboneka mu gitondo kare kare iza kurya ibigori no kumugoroba noneho abahinzi bakayihandura cyangwa  bagatera n’imitiariyo mpamvu kugeza ubu ibigori bateye bimeze neza.

Yagize ati : “Nkongwa turayifite ariko ntabwo iduhangayikishije. Sinabwo bwa mbere tuyirwaje abahinzi bamenyereye ko iyo bahinze ibigori baba biteguye ikibazo cya Nkongwa, ingamba bafashe ni uko iyo bamaze gutera imbuto y’ibigori basura imirima yabo  kenshi, babonamo ibimenyetso bya Nkongwa bagatangira kuyihandura noneho bakagura n’imiti.

Yagize ati : “Twabwiye abacuruzi b’inyongeramusaruro baguze imiti, bayifite mu bubiko bwabo, iyo umuhinzi yagize ikibazo cya Nkongwa abona aho agura umuti, yaba adafite ubushobozi buhagije abahinzi bane cyangwa batanu bakifatikanya bakagura icupa,  bakagakoresha.”

Umurenge wa Shyira ugira imidugudu 31, buri mudugudu ufite umujyanama w’ubuhinzi, buri mujyanama w’ubuhinzi afite umurima ntangarugero yakoze aho atuye iwabo mu mudugudu ni ukuvuga ngo umujyanama w’ubuhinzi ahamagara abahinzi batuye mu mudugudu akabigishiriza ku karima ntangarugero, iyo abigisha abigisha ibintu bya tekiniki y’ubuhinzi, akabigisha tekiniki zo kurwanya indwara n’ibyonnyi, aha ni naho bigira kurwanya Nkongwa idasanzwe.

Ikibaya cya Mukungwa gihinzwe ku buso bwa hegitari 150.

Kuri ubu barateganya ko kuri hegitari 1 bazabona umusaruro wa toni 4  kandi zishobora kuzarenga.

Asaba abahinzi gusura kenshi imirima yabo, gukora isuku babagara ibyatsi birimo bakamenera kuko iyo harwanywa Nkongwa idasanzwe  ari ngombwa cyane isuku mu murima noneho yabona hari ikibazo kivutse akihutira kubibwira umujyanama w’ubuhinzi nawe agahita akimenyesha agoronome w’akagari nawe akakigeza kw’agoronome w’umurenge nyuma bagafatanya ingamba mu kukirwanya.

Dukuzemariya Beata, umujyanama mu by’ubuhinzi mu murenge wa Shyira mu karere ka Nyabihu

Soma inkuru yose hano

Yanditswe na : MUKAGAHIZI ROSE

Comments are closed, but trackbacks and pingbacks are open.

error: Alert: Content is protected !!