Nyarugenge: Kipharma yishyuriye mituweri imiryango 95

Imiryango 95 yo mu mudugudu w’Intwari, umwe mu midugudu igize Umurenge wa Rwezamenyo mu karere ka Nyarugenge barishimira ko bagiye gutangira umwaka mushya wa 2020 bafite ubwisungane mu kwivuza bahawe na Kipharma.

Ubuyobozi bwa sosiyete Kipharma ikorera mu Mujyi wa Kigali kuri uyu wa Gatanu  bwahaye ubwisungane mu kwivuza abaturage 333 mu rwego rwo kubafasha kuzatangira umwaka mushya bafite uburenganzira bwo kwivuza bityo bakomeze kugira ubuzima bwiza  buzira umuze.

Uwimana Salama umwe mu bahawe ubwisungane mu kwivuza yashimye Kipharma yabazirikanye mu gihe bagiye gutangira umwaka, avuga ko we n’umuryango we w’abana batatu, ubusanzwe bagiraga ibibazo byo kwivuza mu gihe babaga barwaye bakagura imiti mu buryo bwa magendu.

Ati   “Kuba baduhaye mituweri hari ikintu kinini bigiye kumfasha kuko nge n’umuryango w’abana 3, ubu kuba mu kiciro cya mbere cy’ubuduhe nta bushobozi bwo kujya kwa muganga ariko ubu twizeye ko ubuzima bwacu butekanye kandi tugiye kugira ubuzima buzira umuze nabo mu muryango wange kandi ntawe uzongera kurembera mu rugo.’’

Umunyamabanga Nshingwabikorwa w’Umurenge wa Rwezamenyo, Uwamwiza Chantal, yabwiye itangazamakuru ko iyo abafatanyabikorwa nk’abo bahaye ubwisungane abaturage bo mu murenge ayobora ari bimwe mu bituma bagera ku ntego y’imihigo baba bariyemeje kugeraho by’umwihariko ku birebana n’imibare y’abaturage bafite ubwisungane  mu kwivuza.

Ati “Nubwo ubu tugeze kuri 68% ndizera ko  imibare igiye kwiyongera,  aba 333 bahawe mituweri bishyuriwe  twizeye ko bazongera umubare w’abayifite muri uyu murenge uzamuke  uve kuri 68,7%  nibura ugere kuri 78,7%. Kuba bahawe mituweri y’umwaka wose ni ikintu kiza, rero turabasaba kudapfusha ubusa aya mahirwe bage bivuza  kandi ku gihe mu gihe bagize ikibazo.”

Umuyobozi Mukuru ushinzwe ibikorwa by’ubuvuzi muri Minisiteri y’Ubuzima MINISANTE, Dr. Muvunyi Zuberi,  agaruka ku bikorwa bya Kipharma mu myaka 50 ishize ikorera mur Rwanda, avuga ko  nyuma ya Jenoside yakorewe Abatutsi mu Rwanda  inzego zikiyubaka zihereye ku busa, Kipharama yatanze umusanzu mu gufatanya n’izindi nzego mu kubaka urwego rw’ubuzima batanga imiti, kandi ko MINISANTE izakomeza gufatanya nabo guteza imbere ubuvuzi binyuze mu gutanga imiti myiza kandi yujuje ubuziranenge.

Umunyamabanga Nshingwa bikorwa w’Umurenge wa Rwezamenyo Uwamwiza Chantal aha mitiweri umugenerwabikorwa

Giancarlo Davité, uyobora Kipharma, asanga kwita ku buzima bw’Abanyarwanda by’umwihariko abadafite ubushobozi bwo kwivuza biri mu nshingano ya gahunda zitandukanye zigamije imibereho myiza y’abaturage bazakomeza gushyiramo.

Ati  “Byose tubikora nk’abafatanyabikorwa b’inzego bwite za Leta mu rwego rw’ubuzima, kandi gushyigikira abatishoboye bari mu kiciro cya mbere ntibigarukiye aha  turizeza ko bizakomeza.  Ubu buryo bwiza bwo gushyigikira poritiki y’u Rwanda, yashyizweho kugira ngo umunyarwanda ikiciro cyose yaba arimo, abashe kugira ubushobozi bwo kwivuza ku giciro gito bijyanye n’ubushobozi bwe.

Kipharma yatangiye gukorera mu Rwanda mu 1969, itangizwa n’umutaliyani witwa Vittoro Davité.

Soma inkuru yose hano

Yanditswe na : Twagira Wilson

Comments are closed, but trackbacks and pingbacks are open.

error: Alert: Content is protected !!