Perezida Kagame yakiriye David Luiz ukinira Arsenal waje gusura u Rwanda

Perezida w’u Rwanda, Paul Kagame  kuri uyu wa Gatanu tariki 11 Ukwakira 2019 yakiriye muri Village Urugwiro myugariro w’ikipe ya Arsenal, David Luiz  waje  gusura u Rwanda.

Uyu mukinnyi ukomoka muri Brazil yageze mu Rwanda mu ijoro ryo ku wa Kane tariki 10 Ukwakira 2019 ari kumwe n’umugore we ndetse n’Umubyeyi we aho yaje muri gahunda yo gusura u Rwanda ku bw’ubufatanye ikipe akinira ya Arsenal ifitanye n’u Rwanda yo gukangurira abatuye Isi gusura u Rwanda “Visit Rwanda”.

Akigera mu Rwanda, David Luiz yatangaje ko yishimiye kugera mu gihugu kiza ndetse anashimira uko we n’umuryango we bakiriwe.

David Luiz yakiriwe na Perezida w’u Rwanda, Paul Kagame usanzwe ari n’umukunzi w’ikipe ya Arsenal maze amugenera umwambaro uriho amazina ye (PK) na nimero David Luiz yambara mu ikipe ya Arsenal (23).

 David Luiz uretse kwakirwa na Perezida  yasuye urwibutso rwa Jenoside yakorewe Abatutsi rwa Kigali ruherereye ku Gisozi. Nyuma yo gusura uru rwibutso, yavuze ko yarebye ibyabaye byose muri iki gihugu gusa yishimira kuba cyariyubatse ndetse kikaba urugero rwiza ku bindi bihugu mu kubaka ubumwe kugira ngo  habe iterambere yaba ku  Banyarwanda muri rusange ndetse n’abandi. Yagize ati : Dukwiye kubana mu rukundo, amahoro n’umunezero.”

Mu mwanya w’umuryango mugari w’ikipe ya Arsenal FC, David Luiz Moreira Marinho yashimiye u Rwanda.

Uyu mukinnyi  yahise ajya i Musanze mu Ntara y’Amajyaruguru   aho agomba gusura  Pariki y’Ibirunga  ahaba ingagi  nyuma  kuri uyu wa Gatandantu tariki 11 Ukwakira 2019  bikaba biteganyijwe ko azagaruka muri Kigali akabonana n’abafana mbere y’uko ku Cyumweru tariki 13 Ukwakira 2019 azahaguruka mu Rwanda asubira mu Bwongereza.

David Luiz nyuma y’aho u Rwanda binyuze mu Rwego rw’Igihugu rw’Iterambere “RDB” basinye  amasezerano  y’ubufatanye n’ikipe ya Arsenal FC y’imyaka 3 yo gukangurira abatuye Isi kuza gusura u Rwanda “Visit Rwanda” ni we ubaye umukinnyi wa mbere  w’iyi kipe usuye u Rwanda.

Gusa  kuva muri Gicurasi 2018 hari ibindi bikorwa byagiye biba birimo abatoza baje gutoza abana  ndetse na bamwe mu bakanyujijeho muri iyi kipe barimo  Alex Scott, Tony Adams  na  Lauren baje mu Rwanda mu bihe bitandukanye aho bitabiriye umuhango wo  Kwita Izina abana b’ingagi, umwe mu mihango ikomeye mu Rwanda mu rwego rwo kubungabunga ibidukikije no gukurura ba mukerarugendo.

Myugariro wa Arsenal, David Luiz Moreira Marinho ufite imyaka 32 y’amavuko uyu ni umwaka wa mbere arimo gukinira ikipe ya Arsenal aho yayigezemo muri Kanama 2019 avuye mu ikipe ya Chelsea. Yakiniye kandi ikipe ya PSG mu Bufaransa.

Mu mafoto  ubwo Perezida Paul Kagame yakiraga David Luiz n’umuryango we

David Luiz asura urwibuto

Soma inkuru yose hano

Yanditswe na : BUGINGO FIDELE

Comments are closed, but trackbacks and pingbacks are open.

error: Alert: Content is protected !!