Perezida Kagame yavuze ku kibazo cy’ igishoro bamwe bagaragaza nk’ ‘imbogamizi ku ishoramari’

Ku kibazo cy’ igishoro abifuza gutangira ishoramari bagaragaza nk’ imbogamizi, Perezida Kagame avuga ko hazarebwa uburyo ikigega gitera inkunga guhanga udushya cyajya gifasha imishinga igitangira igatera imbere.

Kuri uyu wa 7 Ukuboza 2019, ubwo yaganiraga n’ ububyiruko rugera kuri 600 rurimo abakikorera n’ abashoramari yagize ati “(Ibijyanye no kubona igishoro ku bagitangira) navuga ko twatangiye kubikora, igihugu cyashyizeho ikigega gitera inkunga guhanga udushya, ariko simvuga ko gushora mu guhanga udushya bigomba guhuzwa no gutera inkunga kwihangira imirimo. Tuzareba uburyo kugira amahirwe kuri icyo kigega byafasha imishinga igitangira gutera imbere”.

Perezida Kagame yavuze ko gutangira ishoramari bitangirira ku guhindura imitekerereze, kubona ko ibintu bishoboka, no kurebera kubwo abantu bakoze ntusubiremo ibyo abakoze ahubwo ukagendera ku gitekerezo cyabo ugakora ikintu gishya.

Yagize ati “Icyo nabwira abakiri bato ni uko bafite byose muri bo n’ impande zabo”

Perezida Kagame yavuze ko icyo Leta y’ u Rwanda iri gufasha urubyiruko ari ukuruha amahirwe agana yo kwiga ati “Icyo nicyo tugomba kubaka muri mwe, ku birenze ibyo ikirere nta mupaka gifite”.

Umukuru w’ igihugu yagaragaje ko uburezi ari ingenzi ku ishoramari no kwihangira imirimo, kuko aribwo ntangiriro, gusa ngo kuba Leta y’ u Rwanda ishyiraho umwanya wo guhuriza hamwe urubyiruko rukaganira ku bibazo bihari n’ uburyo byakemuka ngo nabwo ni ikintu cy’ ingenzi.

Ati “Dushishikariza urubyiruko kujya hamwe bagashaka ibibazo, ibyo bibazo bakabihinduramo amahirwe bakabishoramo imbaraga n’ ibitekerezo. Iki na cyo ni ikintu cy’ ingenzi kuko birangira kibyaye umusaruro”.

Leta y’ u Rwanda yiyemeje kujya ihanga imirimo mishya ibihumbi 200 buri mwaka. Kugeza ubu imirimo ihangwa buri mwaka ni ibihumbi 140.

Hagendewe ku gisobanuro gishya cyashyizweho n’Urwego mpuzamahanga rushinzwe umurimo imibare mishya y’uko ubushomeri buhagaze mu Rwanda ni 13,2% aho kuba 2,5% nk’uko byari biri mu bushakashatsi rusange bugaragaza imibereho y’ingo mu Rwanda, EICV4.

Imibare y’ ikigo cy’ igihugu cy’ ubushakashatsi NISR igaragaza ko mu Rwanda ko imibare mishya y’ubushomeri mu mujyi ari 16%, naho mu cyaro ni 12,6%. Ubushomeri mu bagabo ni 13% mu bagore ni 14%

Abafite ibyo bakora mu Rwanda ni 42,8% ariko hagendewe k’uko imibare yakorwaga mbere abari bafite akazi ni 80%.

Soma inkuru yose hano

Yanditswe na : Nsanzimana Ernest

Comments are closed, but trackbacks and pingbacks are open.

error: Alert: Content is protected !!