RDRC yashimiwe kwimakaza ubumwe n’ubwiyunge mu bahoze ari abasirikare

Komisiyo y’Igihugu yo gusezerera no gusubiza mu buzima busanzwe abahoze ari abasirikare (RDRC) yahawe igihembo cy’ubudashyikirwa cya Perezida w’Ikigo mpuzamahanga cy’Ubutwererane cy’Abayapani (JICA) kubera uruhare yagize mu kubaka amahoro, ubumwe n’ubwiyunge ndetse no guharanira imibereho myiza y’abahoze ari abasirikare baturutse mu mitwe itandukanye.

Icyo gihembo cyashyikirijwe ubuyobozi bwa RDRC ku wa Gatanu tariki 8 Ugushyingo 2019 gishingiye ku ruhare iyo Komisiyo yagize mu guhuza abahoze ari ingabo zaturutse mu mitwe itandukanye irimo abahoze ari Ingabo za FPR-Inkotanyi, abahoze mu ngabo za FAR, abahoze muri FDLR no mu yindi mitwe yitwaje intwaro ikorera mu Karere k’Ibiyaga Bigari.

Umuyobozi wa RDRC Mukantabana Séraphine yatangaje ko igihembo bakiriye gishimangira umuhate bashyize mu guharanira amahoro, ubumwe n’ubwiyunge by’Abanyarwanda mu myaka 25 ishize u Rwanda ruvuye muri Jenoside yakorewe Abatutsi.

Yakomeje avuga ko icyo gihembo ari icy’Abanyarwanda bose n’ubuyobozi burangajwe imbere na Perezida Paul Kagame bwahisemo inzira y’amahoro n’ubunyarwanda mu guharanira iterambere rirambye.

Yakomeje agira ati: “Iki gihembo nubwo ari icya RDRC ariko ni icy’Abanyarwanda bose, ni icy’ubuyobozi bwacu bwitangiye kugira ngo Abanyarwanda babeho mu mahoro n’umutekano byo nkingi y’Amajyambere. Kemeza y’uko babona ko twakoze umurimo w’indashyikirwa mu rwego rwo gushimangira amahoro n’imibereho myiza y’abo dushinzwe.”

RDRC yashimiwe by’umwihariko kuba mu myaka 25 imaze gusezerera no gusubiza mu buzima busanzwe abahoze ari abasirikare barenga ibihumbi 82, barimo abahoze mu mitwe yitwaje intwaro barenga ibihumbi 12 ndetse n’abamugariye ku rugamba 3,400.

Iki gihembo gitangwa na Perezida wa JICA buri mwaka gitanzwe ku nshuro ya 15, aho cyahawe ibigo ndetse n’abantu ku giti cyabo bagera kuri 58 bagiye bagira uruhare rufatika mu iterambere ry’ibihugu byabo.

Mu bindi bihugu byo muri Afurika byabonetsemo abahabwa icyo gihembo harimo Tanzania, Uganda, Ghana na Maroc.

Umuyobozi ukuriye JICA mu Rwanda Maruo Shin, yatangaje ko batoranyije RDRC kuko mu myaka 25 yakoze ibikorwa biramba bishimangira amahoro, ubumwe n’ubwiyunge mu Rwanda, bikaba bikomeje kubera urugero rwiza amahanga, cyane cyane mu bihugu bigihanganye no kubaka amahoro.

Yagize ati: “RDRC yashyize imbaraga nyinshi mu bikorwa byimakaza ubumwe n’ubwiyunge, ibyo bigira uruhare rukomeye mu iterambere ry’Igihugu. Urugendo rw’ubumwe n’ubwiyunge mu myaka 25 ishize ni igitangaza ku banyamahanga benshi.  Ibyo twagendeyeho cyane duhitamo RDRC ni uburambe bw’ibikorwa byabo n’uburyo bikomeje kubera urugero rwiza ibihugu byo mu Karere k’Ibiyaga Bigari, muri Sudani, Somalia na Nigeria.”

RDRC na yo yashimiye JICA ko hari bimwe mu bikorwa bya RDRC yagizemo uruhare muri iyo myaka 25 ishize, cyane ko gahunda z’ububanyi n’amahanga z’icyo kigo  zirimo no kubaka amahoro mu bihugu ikoreramo.

Soma inkuru yose hano

Yanditswe na : Ntawitonda Jean Claude

Comments are closed, but trackbacks and pingbacks are open.

error: Alert: Content is protected !!