Rubavu:Abasaga 4000 bafite n’indwara zitandura

Ubuyobozi bwatangaje ibi ubwo hizihizwaga umunsi mpuzamahanga wohariwe indwara ya Diyabete aho baganiriye n’abafata imiti ndetse babaganiriza n’ingamba bakwiriye gushiramo ingufu ngo bakomeze bagire ubuzima bwiza.

Kuri uyu wa kane tariki ya 14 Ugushyingo 2019, u Rwanda rwifatanyije n’isi mu kwizihiza umunsi wahariwe kurwanya indwara zitandura zirimo diabete.

Lt Col Dr Kanyankore William umuyobozi mukuru w’Ibitaro bya Gisenyi yemeza ko mu mibare bari bafite mu ntangiriro z’uyu mwaka abagera ku bihumbi 3 bari bafite iki kibazo bamwe ari abo muri Rubavu no mu nkengero zabo ngo hari abaza gufata imiti ariko hari n’abatabyitaho.

Agira ati:”imibare y’abafatwa n’indwara zitandura ahanini ziterwa n’indyo umuntu afata bagenda biyongera,ugereranyije muri aka karere hari abasaga 4000,ni ikibazo gikomeye tugerageza kubitaho nubwo usanga bitoroshye ariko tunashimira Minisiteri y’Ubuzima kuri gahunda idasanzwe yo kwita kuri bene izi ndwara yashizweho kandi iragenda itanga umusaruro.”

Lt Col Dr. William Kanyankore, yakomeje avuga ko umuntu ufite ibimenyetso birimo gucika intege, kugira icyaka no kwihagarika burikanya, kugira isereri no guhuma amaso, kuribwa umutwe, ari ibimenyetso by’ibanze ku murwayi wa Diabete bimusaba kujya kwa muganga bakamukurikirana.

Diabete ni indwara irimo ibyiciro bibiri, kuko hari diabete y’abana iterwa n’uruhererekane ku bo bakomokaho, ariko hari na diabete iterwa n’imihindagurikire y’umubiri nko kongera umubyibuho.

Nubwo umurwayi ugannye amavuriro hari ibyo amusaba gukurikiza mu kurinda umubiri we, abahanga mu mirire batanga inama ku mafunguro yagenewe abarwayi ba diabete, harimo kwirinda amavuta afashe.

Mukantagwabira Donatille, impuguke mu mirire y’abarwayi ba diabete ukorera mu bitaro byitwa La Pervege biherereye muri Kigali , avuga ko umurwayi wa Diabete akwiye kwirinda amavuta afashe akomoka ku nyamaswa, kuko ashobora guziba imitsi bikamugiraho ingaruka z’umwijima n’umutima.

Mukantagwabira avuga indyo yuzuye ku murwayi wa diabete ari ingenzi, icyakora akavuga ko amata menshi ku murwayi wa diabete atari meza, ahubwo abantu bakitabira kurya imboga, kunywa amazi no gukora siporo.

Mu Karere ka Rubavu habarurwa abarwayi ba diabete y’abantu bakuru 950, diabete y’abana 38, abarwaye asima 181 naho abafite umuvuduko w’amaraso ni 1,722 n’izindi ndwara.

Iyi mibare ariko ni iy’ababashije kugera kwa muganga bagasuzumwa, bivuze ko hashobora kuba hari n’abandi bazirwaye ariko batabizi, kuko batageze kwa muganga aho ubuyobozi bugereranya bakagera ku bihumbi 4.

Nubwo ari indwara zitandura, biba byiza iyo umuntu yisuzumishije kare agakurikiranwa akavurwa, kuko hari izishobora gukira mu gihe iyo yivuje indwara imugeze kure bigorana gukira.

Soma inkuru yose hano

Yanditswe na : Nsanzimana Ernest

Comments are closed, but trackbacks and pingbacks are open.

error: Alert: Content is protected !!