Shira amatsiko ku mateka n’ubuzima bw’umuhanzi Social Mula

Mugwaneza Lambert ni umuhanzi nyarwanda wamamaye nka “Social Mula” aririmba mu njyana ya “R&B” na “Afro beat” azwiho kugira ijwi ryiza mu miririmbire ye aho yibanda cyane ku butumwa bwamamaza urukundo n’ubuzima busanzwe.

Social Mula wavutse mu kwezi k’Ugushyingo tariki ya 8 mu 1992, ni umuhererezi mu muryango w’abana batatu, akomoka mu Ntara y’Amajyaruguru mu Karere ka Gicumbi.

Uyu muhanzi yize amashuri abanza aho yavukiye akomeza ayisumbuye, mu kiciro rusange yize mu ntara y’Iburengerazuba mu karere ka Rutsiro, ku kigo cy’amashuri cya Trinite Rutsiro aza gusoreza muri College APAPE i Gikondo.

Uko yatangiye umuziki, indirimbo “Abanyakigali” ikamugira ikimenyabose

Mu kiganiro kirambuye Social Mula yagiranye na Imvaho Nshya yavuze ko yakuze akunda umuziki cyane gusa ngo ntiyiyumvishaga ko umuziki uzamugira icyamamare akaba ari ku rwego ariho ubu.

Yagize ati: “Natangiye kwandika indirimbo kuva nkiri muto, niyumvagamo impano yo kuririmba kuva kera gusa siniyumvishaga ko uzangira icyamamare, nkaba ndi Social Mula uzwi na bose.”

Yakomeje avuga ko urugendo rw’umuziki yarutangiye ubwo yari asoje amashuri yisumbuye mu mwaka wa 2013, ari bwo yatangiye gusinyana amasezerano n’amwe mu mazu yatunganyaga umuziki muri icyo gihe.

Yavuze ko kuba ari uwo ariwe magingo aya byamusabye igihe kitari gito akorana umwete, ategura neza ibihangano bye ndetse no kudacika intege bikaba byaramukuye ku rwego yariho bikamugeza aho ari kugeza ubu.

Social Mula yagize ati, “Indirimbo ya mbere nakoze nafashe ku mafaranga y’ishuri nishyura studio, aho nafashijwe cyane na Producer T-Brown nubwo bitari byoroshye ariko yaramfashije cyane indirimbo yange irasohoka.”

Avuga ko atahwemye gukorana umurava akora indirimbo nyinshi zitandukanye ariko ‘Abanyakigali’ iba ikiraro cy’ubwamamare.

Social yagize ati: “Nakoze indirimbo nyinshi ariko nkoze Abanyakigali, yambereye ikiraro abantu barayikunda batangira kumenya no kugira inyota y’izindi ndirimbo zange, nsa nk’ukabije inzozi zange.”

Uyu muhanzi ashimishwa n’urwego amaze kugeraho abikesha umuziki dore ko ari umwe mu bahanzi bamaze kwigarurira imitima y’abatari bake, ahanini binyuze mu butumwa atanga mu ndirimbo ze.

Ngo kimwe bu bihe byamushimishije mu rugendo rwe rwa muzika ni igihe akora indirimbo ‘Abanyakigali’, yamumenyekanishije mu gihugu aho anyuze hose akumva indirimbo ye irimo gucurangwa nyuma ikamugira ikimenyabose mu Rwanda.

Yagize ati, “Ikintu cyanshimishije muri uyu muziki ni igihe nakoze hit (injyana) ya mbere, najya nyura ahantu nkumva ni yo ndirimbo igezweho, navuga ko aricyo kintu mpora nzirikana kuko yangize uwo ndiwe.”

Social Mula abona kwihangana no guca bugufi ari bimwe mu nkingi zakugeza ku iterambere, kuko ni byo bisigasira igikundiro cya muntu mu bantu, ari nazo mpano ahamya ko zamufashije kuba agishikamye muri uyu muziki amazemo imyaka igera kuri irindwi.

Imurika rya Alubumu ye ya  mbere uzaba ari umunsi w’amateka

Umuhanzi Social Mula witegura gushyira ahagaragara album ye ya mbere, atewe amatsiko menshi nuwo munsi afata nk’umunsi uzaba ukomeye mu buzima bwe bwite n’ubwa muzika muri rusange.

Yagize ati: “Nzamurika album yange ya mbere ku itariki ya 23 Ugushyingo 2019, uyu munsi nywutegerezanyije amatsiko, kuko uzaba ari umunsi ntazibagirwa uzaba ari umunsi ukomeye umunsi w’amateka mu rugendo rw’imyaka igera kuri 7 ndirimba.”

Uyu muhanzi yatangiye kwamamara akorera umuziki muri Studio y’Ibisumizi ubwo yasohoraga indirimbo ze zirimo “Abanyakigali” akomereza ku zindi zirimo “Mu buroko” kugera kuri  “Ma vie” yatumye amenyekana no hanze y’u Rwanda.

Igitaramo kizabera muri Conference And Exhibition Village ahazwi nka Camp Kigali muri iki gitaramo kandi cyo kumurika Alubumu  ye ya mbere, uyu muhanzi ntazaba ari wenyine kuko azafatanya n’abahanzi batandukanye barimo icyamamare gikomoka mu Burundi Big Fizzo, King James, Bruce Melodie, Marina, Yverry na Yvan Buravan.

Kwinjira muri iki gitaramo bizaba ari amafaranga ibihumbi bitanu mu myanya isanzwe ibihumbi 5, ibihumbi 10  mu myanya y’icyubahiro, n’ibihumbi 150 ku meza azicaraho abantu umunani mu myanya y’icyubahiro.

Iyi Alubumu yayise “Ma Vie” ayitiriye indirimbo ye yakunzwe kurusha izindi zose yakoze dore ko imaze kurebwa inshuro zirenga miriyoni ebyiri kuri YouTube, Social Mula yatangaje ko iyi alubumu izaba iriho indirimbo 14 aho 11 muri zo ziri hanze n’izindi 3 yitegura gushyira ahagaragara zizaba zirimo iyo yise  “Yayobye” izasohoka mu cyumweru gitaha.

Iki gikorwa arimo kugifashwamo na kompanyi yitwa Sensitive ndetse na Muyoboke Alexis umenyerewe mu ruganda rwa muzika nyarwanda ndetse na David Bayingana uri mubamufasha kumenyekanisha iki gitaramo ke.

Uyu muhanzi ashima byimazeyo abantu bose bagize uruhare mu iterambere rya muzika ye, ariko cyane cyane abafana be kuko ni bo bamutera imbaraga zo gukora cyane, ashishikariza abiyumvamo impano yo kuririmba kudacika intege no gushyiraho umuhate.

Social Mula ni umwe mu bahanzi bazwiho kuririmba neza mu Rwanda

Big Fizzo bigeze gukorana indirimbo ari mu bahanzi b’imena bazitabira igitaramo cya Social Mula

Soma inkuru yose hano

Yanditswe na : GISUBIZO GENTIL MOISE

Comments are closed, but trackbacks and pingbacks are open.

error: Alert: Content is protected !!