TMC wo muri Dream Boys mu barangije amasomo muri Kaminuza y’u Rwanda

Mujyanama Jean Claude uzwi nka TMC ni umwe mu banyeshuri barenga ibihumbi ikenda barangije muri Kaminuza y’u Rwanda.

Ku wa Gatanu tariki 8 Ugushyingo 2019 ni bwo TMC n’abandi banyeshuri barenga ibihumbi ikenda barangije muri Kaminuza y’u Rwanda bahawe impamyabumenyi, umuhango ukaba warabereye kuri Sitade Mpuzamahanga ya Huye.

Mu banyeshuri 9,382 basoje amasomo yabo muri bo abagera ku 5,894 ni abagabo mu gihe ab’igitsina gore bangana na 3,488.

Umuririmbyi TMC wamamaye mu itsinda rya Dream Boys yasoje Ikiciro cya Gatatu cya Kaminuza (Masters) mu byo Gucunga no Kugenzura imishinga.

TMC washimishijwe n’intambwe yateye yavuze ko yishimiye kuba arangije amashuri y’ikiciro cya gatatu cya Kaminuza.

Yagize ati: Ni ibintu biba bitoroshye ariko ndashimira Imana ko imfashije kurangiza iki kiciro.”

TMC ahamya ko nyuma yo kurangiza iki kiciro azakomeza akiga n’ibikurikiyeho nk’uko yabitangaje mu minsi ishize.

Igitabo uyu muhanzi yanditse arangiza iki kiciro cya Kaminuza kivuga ku ruhare rw’ubuyobozi mu kubaka uruganda rwa muzika rugendera ku ndangagaciro n’imirongo ngenderwaho y’igihugu.

Ni ubushakashatsi yakoze amezi umunani, yifashishije abahanzi, abayobozi n’abandi bafite aho bahuriye n’umuziki nyarwanda.

TMC yize amashuri yisumbuye muri Groupe Officiel yiga ibijyanye n’Ubugenge (Physics) akomereza Kaminuza mu yahoze ari Ishuri ry’Ubumenyi n’Ikoranabuhanga rya Kigali (KIST), ubu ni Kaminuza y’u Rwanda Ishami ry’Ubumenyi n’Ikoranabuhanga.

Soma inkuru yose hano

Yanditswe na : GISUBIZO GENTIL MOISE

Comments are closed, but trackbacks and pingbacks are open.

error: Alert: Content is protected !!