Kuya 1 Nzeri 2022 nibwo byemejwe ko Guverinoma y’u Rwanda n’iya Uganda byemeranyije ko inama ihuriweho igamije ubutwererane mu nzego zirimo ubucuruzi, umutekano n’urujya n’uruza rw’abantu n’ibintu igiye kongera gusubukurwa nyuma y’imyaka irenga 10 yari imaze itaba.

Minisitiri Biruta na mugenzi we, Abubaker Jeje Odongo baganiriye ku mubano w’u Rwanda na Uganda

Ni ibyemeranyijweho mu biganiro byahuje Minisitiri w’Ububanyi n’Amahanga w’u Rwanda, Dr Vincent Biruta na mugenzi we wa Uganda, Odongo Jeje Abubakhar, byabaye kuri uyu wa Kane tariki 1 Nzeri 2022 igamije ubutwererane mu nzego zirimo ubucuruzi, umutekano n’urujya n’uruza rw’abantu n’ibintu igiye kongera gusubukurwa nyuma y’imyaka irenga 10 yari imaze itaba.

Itsinda ryazanye na Minisitiri w’Ububanyi n’Amahanga wa Uganda

Minisitiri w’Ububanyi n’Amahanga wa Uganda, Odongo Jeje Abubakhar ari mu ruzinduko rw’akazi i Kigali aho yazanye n’itsinda ayoboye ririmo Umunyamabanga Uhoraho muri iyo minisiteri, Bagiire Vincent Waiswa n’Umuyobozi w’Agateganyo ushinzwe Akarere, Ambasaderi Arthur Kafeero.

Inkuru dukesha IGIHE Mu gitondo cyo kuri uyu wa Kane yahuye na mugenzi we w’u Rwanda, Dr Biruta bagirana ibiganiro byagarutse ku kurebera hamwe aho kuzahura umubano w’ibihugu byombi bigeze n’izindi ngingo zitandukanye zirimo umutekano mu karere.

Aba bombi bagiranye ikiganiro n’itangazamakuru, aho Minisitiri Odongo Jeje Abubakhar yavuze ko umubano wa Uganda n’u Rwanda udashingiye ku bihugu ahubwo ari umubano ushingiye ku buvandimwe n’isano abaturage b’ibihugu byombi bafitanye.

Ati “Ni byo nahoze mbwira mugenzi wanjye, umubano w’u Rwanda na Uganda ntabwo ari uw’ibihugu ahubwo ni uw’abaturage. Dufitanye umubano ushingiye ku isano y’amaraso amwe, ushingiye ku mateka; niyo mpamvu dukwiye kubyubakiraho kugira ngo dukore ibishoboka byose tugirane umubano ubyarira inyungu abaturage bacu.”

Yakomeje agira ati “Mu biganiro twagiranye muri iki gitondo twabashije kureba kuri ibyo byose, amateka, isano aho dushaka kubihinduramo ijwi rimwe ku bibazo biri mu mubano wacu byaba mu mutekano ndetse n’iterambere. Ibyo ni byo biganiro bya dipolomasi na politiki twagiranye muri iki gitondo.”

Minisitiri Dr Biruta yavuze uru ruzinduko rwabaye umwanya wo kuganira ku mubano w’ibihugu byombi ariko no kugaruka ku bibazo birimo umutekano byugarije Akarere ka Afurika y’Iburasirazuba, impande zombi zihuriyejo.

Yavuze ko mu byumvikanyweho harimo kuba inama ihuriweho ijyanye n’ubutwererane yaherukaga kuba mu 2012 yongera gusubukurwa ikaba izaterana bitarenze Werurwe 2023.

Yagize ati “Byose twabiganiriye ariko icy’ingenzi twumvikanye ni uko inama irebana n’ubutwererane ibihugu byacu byombi bihuriraho izaterana muri Werurwe 2023.”

“Nibwo tuzaboneraho umwanya wo kujya mu birebana n’ubutwererane mu nzego zitandukanye, umutekano, ubucuruzi n’ubuhahirane, ubutabera n’ibirebana n’urujya n’uruza rw’abantu n’ibintu. Ndamushimira kuba yakoze uru rugendo rwerekana ko umubano w’ibihugu byacu wasubiye ku murongo ukaba urimo kugenda neza.”

Ku ntambara yo muri RDC…

Umuyobozi muri Minisiteri y’Ububanyi n’Amahanga ushinzwe Afurika, Shakilla Umutoni Kazimbaya na we yitabiriye ibiganiro hagati ya Uganda n’u Rwanda

Minisitiri Odongo Jeje Abubakhar yagiriye uruzinduko mu Rwanda mu gihe ibihugu byombi bifite aho bihuriye n’ibirego bya Repubulika Iharanira Demukarasi ya Congo ku ntambara icyo gihugu kirwanamo n’Umutwe w’Inyeshyamba wa M23.

Imirwano ihuza ingabo za Repubulika Iharanira Demokarasi ya Congo (FARDC) na M23 yubuye muri Gicurasi 2022, ikaza umurego kugeza ubwo M23 yafataga Umujyi wa Bunagana uri hafi ya Uganda. Uyu mutwe kandi wakomeje kujya wigarurira utundi duce by’umwihariko utwo muri Ntara ya Kivu y’Amajyaruguru.

Ku rundi ruhande ariko, kuva iyo mirwano yakwanduka, RDC yagiye yumvikana ishyira mu majwi u Rwanda kuba ari rwo rushyigikira M23, ibirego rwateye utwatsi rukavuga ko ari ibinyoma kuko nta musirikare warwo wigeze akandagira ku butaka bw’icyo gihugu.

Umwuka mubi wakomeje kuba hagati y’u Rwanda na RDC kugeza ubwo muri Kamena 2022, i Nairobi muri Kenya habereye inama y’abakuru b’ibihugu by’akarere, igomba kwemeza uburyo bwo kohereza ingabo mu Burasirazuba bwa RDC zo gutsinsura imitwe yitwaje intwaro.

Minisitiri Odongo Jeje Abubakhar yavuze ko ibyo impande zombi zigomba gushyira mu bikorwa ari ibyemeranyijweho n’abakuru b’ibihugu muri iyo nama kandi bigaharanira kurinda imbibi zabyo kugira ngo hatagira ubihungabanyiriza umutekano.

Ati “Ibyo turimo gukora ni ugushyira mu bikorwa iyo myanzuro kugira ngo tugire u Rwanda rufite amahoro n’umutekano ndetse na Uganda ifite amahoro n’umutekano, kubaho nta bwoba duterwa n’ibihugu duturanye.”

Uruzinduko rwa Minisitiri Odongo Jeje mu Rwanda ruje mu gihe ibihugu byombi bikomeje kuzahura umubano wari warazambye guhera mu 2017.

ubwo u Rwanda rwashinjaga icyo gihugu guha rugari abashaka kuruhungabanyiriza umutekano, mu gihe Uganda na yo yavugaga ko u Rwanda rwohereza intasi muri icyo gihugu. Buri ruhande rwahakanaga ibyo rushinjwa.

Uko gushwana kwatumye u Rwanda ruburira abaturage barwo kujya muri Uganda kuko hari benshi bari bamaze kugirirwa nabi binjiye muri icyo gihugu, bagafungwa abandi bagakorerwa iyicarubozo.

Ubucuruzi bw’ibihugu byombi bwarashegeshwe kuko umupaka wa Gatuna woroshyaga urujya n’uruza wafunzwe, abashoramari n’abacuruzi b’abanyarwanda bagahagarika guhahirana na bagenzi babo muri Uganda.

Ibintu byatangiye gusubira ku murongo guhera muri Mutarama 2022 ubwo Umugaba Mukuru w’Ingabo zirwanira ku butaka muri Uganda akaba n’Umuhungu wa Perezida Museveni, Lt Gen Muhoozi Kainerugaba yagiriraga uruzinduko mu Rwanda agahura na Perezida Kagame.

Yagarutse muri Werurwe uwo mwaka biyemeza kurebera hamwe icyateye umwuka mubi hagati y’impande zombi no kugishakira umuti mu maguru mashya.

 

TURABASABA GUKURIKIRA INKURU TUBAGEZAHO NO KUDUHA IBITEKEREZO CYANGWA INYUNIZI MURAKOZE.

INSTAGRAM: @AGEZWEHO.COM

Burundi: Uwiyita umwami yatawe muri yombi hamwe n’abayoboke be

Umunyamuziki nyarwanda Bruce Melody byemejwe ko yataye muri yombi n`Uburundi.

Filime z`ikunzwe zizasohoka mu kwezi gutaha udakwiye gucikwa

Leave a Reply

Your email address will not be published. Required fields are marked *