Umugaba w’Ingabo za Uganda zirwanira ku butaka, Lt Gen Muhoozi Kainerugaba, yongeye kuvuga imyato Perezida Paul Kagame w’u Rwanda n’umubyeyi we Yoweri Museveni abita ’intwari ze’.

Mu butumwa Gen Muhoozi yanyujije kuri Twitter yagize ati: “Aba baracyari intwari zanjye! Ugarwa [Uganda+ Rwanda] …bizakomeza gutsinda!”

Amagambo ya Gen Muhoozi yari aherekeje ifoto ya Perezida Yoweri Museveni wa Uganda n’iya mugenzi we w’u Rwanda, Paul Kagame.

Uyu mugabo yanditse kuri Twitter ye ubu butumwa nyuma y’amasaha make u Rwanda rufunguye umupaka wa Gatuna uruhuza na Uganda wari umaze hafi imyaka itatu ufunze kubera umwuka mubi wari hagati y’ibihugu byombi.

Gatuna yongeye kuba nyabagendwa nyuma y’icyumweru kimwe n’iminsi ibiri Gen Muhoozi agiriye uruzinduko rw’umunsi umwe i Kigali akaganira na Perezida Kagame ku bikenewe mu kuzahura uriya mubano.

Guverinoma y’u Rwanda iheruka gutangaza ko nyuma y’uruzinduko rwa Gen Muhoozi yasanze hari “umugambi wo gukemura ibibazo byagaragajwe n’u Rwanda, ndetse n’ubushake bwa Guverinoma ya Uganda mu gushaka umuti w’ibibazo bitarakemuka”.

Yavuze ko yyafashe icyemezo cyo gufungura uyu mupaka, mu rwego rwo kwihutisha ibikorwa byo gukemura ibibazo biri hagati y’ibihugu byombi.

Lt Gen Muhoozi Kainerugaba yaherukaga kuvuga Perezida Kagame imyato ubwo yifashishaga Twitter mu minsi yashize akamwira se wabo.

Perezida Kagame ubwo yabazwaga na Jeune Afrique uko yakiriye ubu butumwa, yavuze ko “hari abishimira amafoto y’ubuyobozi, bakumva byarangiye. Njye siko mbibona. Yego nishimiye ibyatangajwe n’umuhungu wa Perezida Museveni ariko nizeye ko bizarenga hariya hakavamo ibisubizo bya nyabyo.”

Perezida Kagame icyo gihe yavuze ko n’ubwo u Rwanda na Uganda bari bamaze igihe mu biganiro nta musaruro wabyo yari yakabonye.

Ati: “Buri mushoramari aba akwiye kugenzura akamenya neza umusaruro uva mu byo yashoye. Ni byo turi mu biganiro, ariko ntegereje kureba niba bikwiye kubishoramo. Kuri ubu, nta musaruro ndabona kandi intumwa nakira ndabizibwira”.

By Admin

Leave a Reply

Your email address will not be published. Required fields are marked *