Twaha Abdul w’imyaka 30 y’amavuko afungiye kuri sitasiyo ya RIB ya Kamembe mu karere ka Rusizi, akaba yemera icyaha, yemera n’ibihano amategeko yamuteganiriza ariko ngo akumva ahawe imbabazi ari byo byamubera byiza.

Ni nyuma yo gutabwa muri yombi ku wa 12 Mutarama 2022 bivugwa ko yashakaga gukorera ikizamini cy’uruhushya rwo gutwara ibinyabiziga mugenzi we witwa Mwizerwa Issa wari wamwemereye amafaranga 300.000.

Uyu musore wafatiwe muri ibi bizamini muri aka karere aturutse mu karere ka Gasabo mu mujyi wa Kigali, ngo yafatanywe irangamuntu n’uruhushya rw’agateganyo rwo gutwara ibinyabiziga bya Mwizerwa Issa yari aje gukorera icyo kizamini, ariko ngo yarakuye ifoto ya mugenzi we ku ruhushya rw’agateganyo rwe ashyiraho iye mu rwego rwo kujijisha kugira ngo abashe kumukorera icyo kizamini kuri kiriya gihembo cy’amafaranga 300.000 yari yamwemereye.

Twaha Abdul wemera icyaha, yagize ati: ’’Nafashwe nje gukorera umuntu ikizamini cya perimi nk’uko yari yabinsabye,yanyemereye amafaranga 300.000 icyakora yari atarayampa. Nta kindi narenzaho,amategeko akore akazi kayo nubwo buri wese aba yumva yahitamo imbabazi’’.

Umuvugizi wa paolisi mu ntara y’uburengerazuba CIP Karekezi Twizere Bonaventure, mu kiganiro na Bwiza.com, yavuze ko uyu Twaha akurikiranyweho icyhaha cyo guhimba no guhindura inyandiko.

Ati’’ Ni byo koko,uwo mugabo yaje gufatwa yari yaje gukora ikizamini cy’uruhushya rwo gutwara ibinyabiziga, biza kugaragara ko ikizamini yakoraga yagikoreraga undi muntu.

Umupolisi yamusabye irangamuntu n’uruhushya rw’agateganyo,arebye abona ifoto iri ku irangamuntu itandukanye n’iri kuri urwo ruhushya rw’agateganyo kuko ifoto ya nyiri ubwite yari yamaze kuyikura kuri urwo ruhushya ashyiraho iye, mu rwego rwo kujijisha.

Yahise atabwa muri yombi aniyemerera ataruhanije ko ari undi yakoreraga wari wamwemereye amafaranga 300.000,uwo yakoreraga aracyashakishwa kuko atabonetse aho ikizamini cyakorerwaga.’’

Yakomeje ati’’ Akurikiranyweho icyaha cyo guhimba no guhindura inyandiko,urumva habayemo n’inzira zo gukura ifoto ku ruhushya rwo gutwara ibinyabiziga hagamijwe gukora icyo cyaha, kimuhamye yahanishwa ingingo ya 276 yo mu gitabo cy’amategeko ahana ibyaha mu Rwanda,aho yahabwa igifungo kiri hagati y’imyaka 5 na 7 n’ihazabu ya miliyoni kuva kuri 3 kugeza kuri 5 z’amafaranga y’u Rwanda cyangwa kimwe gusamuri ibyo bihano.’’

Ibibazo nk’ibi ngo si mu ntara y’uburengerazuba bigaragara gusakuko n’ahandi mu gihugu bikunze kuhagaragara, CIP Karekezi Twizere Bonaventure akavuga ko amayeri yose akoreshwa muri ubwo buryo polisi y’igihugu yamaze kuyatahura, agasaba abashaka impushya zo gutwara ibinyabiziga kuzishaka mu nzira zemewe n’amategeko, bakiga bakanakora imyitozo ibafasha gukora ibyo bizamini aho gushora utwabo mu bitazabahira.

By Admin

Leave a Reply

Your email address will not be published. Required fields are marked *